Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .v. Capittel.

1

⁺ENde ick heb mi omghekeert ende heb mijn ooghen opghehauen ende ghesien, ende siet eenen vlieghenden boec.

+ A

2

Ende hy heeft tot my gheseyt. Wat siet ghy? Ende ick heb gheseyt. Ick sie eenen vlieghenden boeck, zijn lengde is van twintich cubitus, ende sijn breydde is van thien cubitus.

3

Ende hy heeft my gheseyt. Dit is die vermalendijdinghe die wtgaet op daensicht van tgheheel eertrijck, want alle dief, alsoo daer af ghescreuen is, sal gheordeelt worden, ende alle die sweert sal daer wt desghelijcs gheordeelt worden.

4

Ick sal dien wtleyden, ⁺seyt die Heere der heyrscaren, ende hy sal comen tot den huyse des diefs, ende totten huyse des gheens die by mijnen naem valschelijck sweert, ende hy sal woonen int midden van sijn huys, ende hy sal hem vernielen ende sijn houten, ende sijn steenen.

+ B

5

Ende den enghel is wtgheghaen die in my sprack, ende hy heeft tot my gheseyt. Heft op v ooghen, ende besiet wat dit is datter wtgaet.

6

Ende ick heb gheseyt. Wat ist? Ende hy heeft gheseydt. Dit is die wtgaende cruycke. Ende hy heeft gheseyt. Dese is hen ooghe in gheheel eertrijck.

7

⁺Ende siet daer worde een talent loots ghebrocht, ende siet een vrou-

+ C

[p. *713]

we sittende int midden vander cruycken.

8

Ende hy heeft gheseydt. Dese is die ongoddelijcheyt. Ende hy heeftse gheworpen int midden vander cruycken, ende heeft den looten clont in haren mont gheworpen.

9

⁺Ende ick heb mijn ooghen opghehauen ende ghesien. Ende siet twee vrouwen wtgaende, ende den gheest was in hen vloghelen, ende si hadden vloghelen als eens kiekendiefs vloghel, ende si hebben die cruycke opghehauen tusschen die eerde ende den hemel.

+ D

10

Ende ick heb gheseyt totten enghel die in my sprac. Waer henen draghen dese die cruycke?

11

Ende hy heeft tot mi gheseydt, om dat haer een huys soude ghetimmert worden int lant van Sennaar, ende dattet gheuesticht ende aldaer ghestelt worde op zijn basement.