Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .iiij. Capittel.

1

⁺ENde die enghel is wederghekeert die in my sprack, ende hy heeft my verwect als een man die van sijnen slaep verwect wort.

+ A

2

Ende hy heeft tot my gheseyt. Wat siet ghy? Ende ick heb gheseyt. Ick heb ghesien, ende siet eenen candelaer gheheel gulden, ende sijn lampe was op sijn opperste, ende sijn seuen lichters waren daer op, ende seuen ghiet pottekens tot die lichters die op zijn hooft waren.

3

Ende twee olijfboomen daer bouen den eenen aen die rechte sijde der lampen, ende den anderen aen die slincke sijde.

4

Ende ick heb gheantwoort, ⁺ende ick seg totten enghel die in my sprac segghende. Wat sijn dese mijn Heere?

+ B

5

Ende die enghel die in my sprack heeft gheantwoort ende tot my gheseyt. En weet ghy niet wat dese dinghen sijn? Ende ick heb gheseydt. Neen ick mijn Heere.

6

Ende hi heeft gheantwoort ende tot my gheseyt segghende. Dit is des Heeren woort tot Zorobabel segghende. Niet in eenich heyr, noch in machticheyt maer in mijnen gheest, seyt die Heere der heyrscaren.

7

Wie sijt ghi grooten berch voor Zorobabel? tot effenheyt, ⁺ende hy sal den principaelsten steen wtbrenghen ende hy sal die gratie sijnder gratien ghelijck maken.

+ C

8

Ende dwoort des Heeren is tot my ghesciet segghende.

9

Zorobabels handen hebben dit huys ghefundeert, ende sijn handen sullen dat volmaken. Ende ghy sult weten dat die Heere der heyrscaren my tot v lieden ghesonden heeft,

10

want wie heeft die cleyn daghen versmaedt? ende si sullen blijde sijn, ende sien den tennen steen in Zorobabels hant. Dese seuen sijn die ooghen des Heeren, die al om loopen ouer gheheel eertrijck.

11

Ende ick heb gheantwoort, ⁺ende tot hem gheseyt. Wat sijn dese twee olijfboomen ter rechter sijden vanden candelaer, ende tot sijnder slincker sijden?

+ D

12

Ende ick heb ten tweeden gheantwoort ende gheseyt tot hem. Wat sijn dese twee aren der olijfboomen die by die twee gulden becken sijn, in die welcke sijn die ghieterkens van goude?

13

Ende hy heeft tot my gheseyt segghende. En weet ghy niet wat dese sijn? Ende ick heb gheseyt. Neen ick mijn Heere.

14

Ende hy heeft gheseyt, dit zijn twee sonen der olien, des lichts, die by den heerscapper van gheheel aertrijck staen.