Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .iij. Capittel.

1

⁺ENde die Heere heeft my ghetoont Iesum den grooten priester staende voor den enghel des Heeren, ende Satan stont aen sijn rechte sijde, dat hy hem teghen sijn soude.

+ A

2

Ende die Heere heeft tot Satan gheseyt. Die Heere berispe in v Satan, ende die Heere berispe in v die Ierusalem ghecoren heeft, en is dit niet een ghebrant hout wten viere ghetrocken?

3

Ende Iesus was ghecleedt met onreyne cleederen, ende hy stont voor des enghels aensicht,

4

⁺Die welcke heeft gheantwoort ende gheseyt tot die ghene die voor hem stonden segghende. Neemt dese onreyne cleederen van hem. Ende hy heeft tot hem gheseyt. Siet ick heb v ongherechticheyt van v ghenomen, ende ik heb v met feestelijcke cleederen aenghedaen.

+ B

5

Ende hy heeft gheseyt. Stelt eenen suyueren myter op zijn hooft, ende si hebben eenen suyueren myter ghestelt op zijn hooft, ende sij hebben hem met cleederen ghecleedt, ⁺ende des Heeren enghel stont.

+ C

6

Ende des Heeren enghel betuychde Iesum segghende.

7

Dit seyt die Heere der heyrscaren. Ist dat ghy in mijn weghen wandelt, ende mijn bewaringhe bewaert, soo sult ghy ooc mijns huys ordeelen, ende mijn voorhouen bewaren, ende ick sal v wandelaers gheuen vanden ghenen die hier nv by staen.

8

Hoort Iesu groote priester, ghi ende v vrinden die in v teghenwoordicheyt woonen want het sijn wonderbaerlijcke mannen, ⁺want siet ic sal mijnen knecht den opganc aenbrenghen,

+ D

9

want siet den steen dien ick ghegheuen hebbe voor Iesu, op eenen steen sijn seuen ooghen. Siet ic sal sijn wtghesneden werc wtsnijden, seyt die Heere der heyrscaren. Ende ick sal die boosheyt sijns lants wechnemen in eenen dach

10

In dien dach, seydt die Heere der heyrscharen, sal een man sijnen vrint roepen onder den wijngaert, ende onder den vijgheboom.