Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .ii. Capittel.

1

⁺ENde ick heb mijn ooghen opghehauen, ende ick heb ghesien, ende siet daer was een man ende in sijn hant was een meters coordeken.

+ A

[p. *712]

2

Ende ick heb gheseyt. Waer henen ghaet ghy? Ende hy heeft tot my gheseyt. Om Ierusalem te meten, ende dat ick sien mach hoe groot dat haer breydde, ende hoe groot dat haer lengde is,

3

⁺Ende siet die enghel die in my sprack ghinck wt, ende eenen anderen enghel ghinc wt hem te ghemoete.

+ B

4

Ende hy heeft tot hem geseyt. Loopt ende spreect tot desen knecht segghende. Sonder muer sal Ierusalem bewoont worden ouermidts die menichte der menschen ende der beesten int midden van haer.

5

Ende ick sal haer sijn, seyt die Heere, eenen vierighen muer int ronde, ende tot een glorie int midden van haer.

6

O o vliedt vant noorden lant, seyt die Heere, want in die vier winden des hemels heb ick v verstroeyt, seyt die Heere.

7

⁺O Sion vliedt die by die dochter van Babilonien woont,

+ C

8

want dit seyt die Heere der heyrscaren. Nae die glorie heeft hi my ghesonden tot die Heydenen, die v lieden berooft hebben, want wie v lieden raect, die raect den appel van mijnder ooghe,

9

want siet ick heffe mijn hant op henlieden, ende sij sullen tot eenen roof sijn den ghenen die henlieden dienden, ende ghy sult weten dat die Heere der heyrscaren my ghesonden heeft.

10

Loeft ende verblijt v ghi dochter van Sion, want siet ick come, ende ick sal int midden van v lieden woonen, seyt die Heere.

11

⁺Ende daer sullen veel volcken totten Heere versaemt worden in dien dach, ende si sullen my tot een volck wesen, ende ick sal int midden van v woonen, ende ghy sult weten dat die Heere der heyrscaren my tot v ghesonden heeft.

+ D

12

Ende die Heere sal Iudam sijn deel besitten int gheheylicht lant, ende hy sal Ierusalem noch verkiesen,

13

Alle vleesch swijghe van des Heeren aensicht, want hy is opghestaen van sijn heylighe woonstadt.