Den gheheelen Bybel, Inhoudende het oude ende nieuwe Testament (Leuvense bijbel 1548)

Dat ierste Capittel.

1

⁺IN die achste maent, int tweede iaer van Darius, is het woort des Heeren ghesciet tot Zachariam den sone Barachie des soons Addo den propheet segghende.

+ A

2

Die Heere is gram op v vaderen met toornicheyt

3

Ende ghy sult tot henlieden segghen. Dit seyt die Heere der heyrscaren. Bekeert v tot my, seyt die Heere der heyrscaren, ende ick sal mi tot v bekeeren, seydt die Heere der heyrscaren.

4

En weest niet ghelijc v vaderen, tot die welcke die ierste propheten riepen segghende. Dit seyt die Heere der heyrscaren. Bekeert v van v quade weghen ende van v alderquaetste ghedachten, ende sij en hebbent niet ghehoort, noch si en hebben op mi niet gheacht, seyt die Heere,

5

waer sijn v vaders? ende die propheten sullen si inder eewicheyt leuen?

6

Maer nochtans mijn woorden ende mijn wettelijcke gheboden die ick gheboden hebbe mijnen knechten den propheten, ⁺ en hebben die uwe vaders niet beuanghen? Ende si sijn bekeert gheweest, ende hebben gheseydt. Ghelijck die Heere der heyrscaren ghedacht heeft ons te doen na onse weghen ende nae onse vonden, soo heeft hi ons ghedaen.

+ B

7

Inden vierentwintichsten dach der elfster maent Sabath int tweede iaer van Darius is des Heeren woort gheschiet tot Zachariam den sone Barachie, des soons Addo, den propheet segghende.

8

Ick heb ghesien inder nacht, ende siet een man climmende op een root peert, ende hy stont onder die myrtus spruyten, die in die diepte waren, ende nae hem waren roode, ende bonte, ende witte peerden.

9

Ende ick heb gheseyt wat sijn dese mijn Heere? Ende den enghel die in my sprack, heeft tot mi gheseyt. Ick sal v toonen wat dese sijn.

10

Ende die man antwoorde die onder die myrtus spruyten stont, ende hy heeft gheseyt. Dese sijnt die de Heere ghesonden heeft, dat si dlant souden doorwandelen.

11

⁺Ende sij hebben gheantwoort den enghel des Heeren die onder die myrtus spruyten stont, ende si hebben gheseyt. Wij hebben dlant doorwandelt, ende siet alle dlant wort bewoont, ende rust.

+ C

12

Ende des Heeren enghel heeft gheantwoort ende gheseyt. Heere der heyrscaren hoe langhe en suldi niet ontfermen Ierusalem, ende der steden van Iuda, op die welcke ghy gram sijt, dit is nv het tseuentichste iaer?

13

Ende die Heere heeft den enghel die in my sprack gheantwoort goede woorden, troostelijcke woorden.

14

Ende den enghel die my sprac heeft tot my gheseyt. Roept segghende. Dit seyt die Heere der heyrscaren. Ick heb wt liefden gram gheweest op Ierusalem ende Sion met een groote ialourzie.

15

Ende met een groote gramschap ben ick gram op die rijcke Heydenen, want ick heb een luttel gram gheweest, ende si hebbent gheholpen int quade.

16

Daerom dit seyt die Heere. ⁺Ic sal tot Ierusalem wederom keeren in bermherticheden, mijn huys sal in haer ghetimmert werden, seyt die Heere der heyrscaren, ende het richt coordeken sal wtgherect worden op Ierusalem.

+ D

17

Roept noch segghende. Dit seyt die Heere der heyrscaren. Noch sullen mijn steden oueruloeden van goeden, ende die Heere sal Sion noch troosten, ende hy sal Iersualem noch verkiesen.

18

Ende ick heb mijn ooghen opghehauen ende ghesien ende siet vier hornen,

19

Ende ick heb gheseyt totten enghel die in my sprack. Wat zijn dese? Ende hy heeft tot my gheseyt. Dit zijn die hornen die Iudam ghestooten hebben, ende Israel ende Ierusalem.

20

Ende die Heere heeft my ghetoont vier timmerlieden.

21

Ende ick heb gheseyt. Wat comen dese doen? Die welcke sprack segghende. Dit sijn die hornen die Iudam ghestooten hebben elcken man besonder, ende niemant van hen en heeft zijn hooft opghehauen, ende dese sijn ghecomen om die te veruaren, dat sij die hornen der Heydenen neder worpen souden, die den horn opghehauen hebben op dlant van Iuda, dat sij dat souden verstroeyen.