Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xiiij. Capittel.

1

⁺SIet die daghen des Heeren sullen comen, ende v roouen sullen ghedeelt werden int midden van v.

+ A

2

Ende ick sal alle die Heydenen vergaderen in Ierusalem ten strijde, ende die stadt sal inghenomen worden, ende die huysen sullen verdoruen worden, ende die vrouwen sullen ghesceynt werden, ende die helicht vander stadt sal in die gheuanghenisse gaen, ende dat ouerblijfsel des volcs en sal wt der stadt niet wech ghenomen werden.

3

Ende die Heer sal wtgaen ende strijden teghen die Heydenen, ghelijck hy ghestreden heeft inden dach des strijdts,

4

ende zijn voeten sullen staen in dien dach opden berch der olijfboomen, die teghen Ierusalem is oostwaerts, ende den berch der olijfboomen sal ghescoert worden, van sijn helicht oostwaerts ende westwaerts, met een seer groote schoere, ende die helicht vanden berghe sal afgesceyden werden noortwaerts, ende sijn helicht suydtwaerts.

5

⁺Ende ghy sult vlieden tot die valleye van sijnen berghen, want die valleye der berghen sal tsamen gheuoecht worden totten naesten toe, ende ghy sult vlieden ghelijck ghy gheuloden hebt van daensicht der aertbeuinghe, in die daghen van Ozias den coninck van Iuda. Ende die Heere mijn Godt sal comen ende alle sijn heylighen met hem.

+ B

6

Ende tsal wesen in dien dach, ten sal gheen licht sijn maer coude ende vorst.

7

Ende daer sal eenen dach sijn die den Heere bekent is, gheenen dach noch nacht, ende inden tijt des auonts salt licht sijn.

8

Ende tsal wesen in dien dach dat daer sullen leuende wateren wtgaen van Ierusalem, die helicht van die tot die oostzee, ende die helicht van die tot die wterste zee, sij sullen inden somer ende winter wesen.

9

Ende die Heere sal een coninc wesen ouer alle deerde, in dien dach salt een Heere wesen, ende sijnen naem sal een wesen.

10

Ende alle dlant sal weder keeren tot die woestijne, vanden hueuel Remmon tot die suytsijde van Ierusalem, ende hy sal verheuen worden ende woonen in sijn plaetse, van die poorte van Beniamin tot die plaetse der ierster poorten, tot die poorte der hoecken, ⁺ende vanden torre Hananeel, tot des conincs perssen.

+ C

11

Ende sij sullen daer in woonen, ende daer en sal voorts gheen verbanninghe meer sijn, maer Ierusalem sal vrijlijck sitten.

12

Ende dit sal die plage sijn waer mede die Heere alle die Heydenen slaen sal, die ghestreden hebben teghen Ierusalem. Het vleesch eens ieghelijcs staende op sijn voeten sal verdwijnen, ende sijn ooghen sullen verdwijnen in hen gaten, ende hen tonghe sal verdwijnen in haerlieder mont.

13

In dien dach sal daer een groot gherucht des Heeren in henlieden sijn, ende die man sal sijns naesten hant aengrijpen, ende sijn hant sal vast ghemaect worden op sijns naesten hant.

14

Maer Iudas sal ooc strijden teghen Ierusalem, ende die rijcdommen van alle die Heydenen sullen vergadert worden int ronde, gout ende siluer, ende veel ghenoech cleederen.

15

Ende alsoo sal den val der peerden ende muylen, ende kemelen, ende ezelen, ende alle der beesten die in die heyrlegeren wesen sullen, zijn ghelijc desen val.

16

Ende alle die ouer ghebleuen sullen sijn van alle den Heydenen die ghecomen sijn teghen Ierusalem, ⁺sullen op climmen van iare te iare, om te aenbidden den coninck den Heere der heyrscaren, ende dat sij vieren souden dat feestelijck hoochtijt der tabernakelen.

+ D

17

Ende tsal wesen, dat soo wie vanden gheslachten des lants niet op en climt tot Ierusalem, om te aenbidden den coninck den Heere der heyrscaren, op hen en sal gheenen reghen wesen.

18

Ende ist soo dat het gheslachte van Egipten niet op waerts en gaet, ende niet en coemt, soo en sal dien reghen op hen niet wesen, maer hen sal eenen val wesen waer mede die Heere slaen sal alle die Heydenen die niet op en climmen, om te vieren die feeste der tabernakelen,

19

Dit sal zijn die sonde van Egipten, ende dit sal die sonde van allen den Heydenen sijn, die niet op en climmen om te vieren die feeste der taber-

[p. *717]

nakelen.

20

In dien dach salt sijn, dat het ghene dat op des peerts toom is, den Heere heylich sal wesen ende die siepotten in des Heeren huys sullen wesen als scalen voor den outaer.

21

Ende all siepot in Ierusalem, ende in Iuda sal gheheylicht wesen den Heere der heyrscaren, ende alle die slachofferanden dooden sullen comen, ende sullen daer aff nemen, ende sij sullen daer in coken, ende daer en sal voortaen gheen coopman meer wesen int huys des Heeren der heyrscaren, in dien dach.

Hier voleyndt die Propheet Zacharias.