Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .ij. Capittel.

1

⁺COemt te samen, vergadert v ghy onminlijc volck

+ A

2

eer dat het beuel bare als ghestubbe den voorby gaenden dach, eer dat ouer v lieden come die gramschap van des Heeren rasenden toren, eer op v lieden come den dach der verbolghentheyt des Heeren.

3

Soect den Heere alle ghy saechtmoedighe der eerden, die zijn ordeel ghedaen hebt, soect den rechtuerdighen, soect den saechtmoedighen, oft ghy eenichsins mocht verborghen werden inden dach van des Heeren rasenden torn,

4

Want Gaza sal verdoruen wesen, ende Ascalon tot een woestijne, Azoten sullen sij inden middach wt worpen, ende Accaron sal wtgheroeyt worden.

5

Wee v die bewoont het zeelken

[p. *709]

der zee, ⁺ghy volck der verdoruene, het woort des Heeren is op v lieden Chanaan der Palestijnen lant ende ick sal v verderuen alsoo datter gheen bewoonder zijn en sal.

+ B

6

Ende het zeelken der zee sal een ruste der herders wesen ende scaepstallen des veets,

7

ende sijn zeelken den ghenen die ghebleuen sal wesen van Iudas huys, daer sullen si gheuoedt worden. In die huysen van Ascalon sullen si teghen auont rusten, want die Heeren hen God salse versoecken, ende hy sal hen gheuanghenisse affkeeren.

8

Ick heb het verwijt van Moab ghehoort, ende die blasphemien der kinderen van Ammon, die si mijnen volck verweten hebben, ende si sijn groot gheworden op hen palen.

9

⁺Daerom soo warachtelijc als ick leue, seyt die Heere der heyrscaren Israels Godt. Moab sal als Sodoma wesen, ende die kinderen van Ammon als Gomorrha, droocheyt der dornen, ende hoopen souts, ende een wildernisse tot inder eewicheyt, die bleuelinghen mijns volcs sullense roouen, ende die ouergebleuene mijnder luyden sullense besitten.

+ C

10

Dit sal hen gheschieden om hen hoouerdicheyt, om dat si gheblasphemeert hebben, ende grootmoedich gheweest hebben ouer tvolck des Heeren der heyrscharen.

11

Die Heere is grouwelijck ouer henlieden, ende hy sal vernielen alle die goden des eertrijcs, ende die mannen sullen hem aenbidden van hen plaetse, alle die eylanden der Heydenen

12

maer oock ghy Morianen sult ghedoot wesen met mijnen sweerde.

13

⁺Ende hy sal sijn hant wtreycken ouer het noorden, ende hy sal Assur verderuen, ende hy sal die schoone tot een woestijne stellen, ende tot een plaetse sonder wech, ende als een wildernisse.

+ D

14

Ende die cudden sullen int midden van haer rusten, alle die beesten der Heydenen, ende den Onocrotalus ende den eghel sullen binnen haer dorpelen woonen, die stemme van datter singt in die venster, die raue opden ouersten dorpel, want ic sal haer macht verminderen.

15

Dit is die gloriose stadt woonende met betrouwen die in haer herte seyde. Ic bent, ende buyten my en is gheen ander meer hoe is si gheworden tot een woestijne, een rustplaetse der beesten? alle die door haer ghaet sal wispelen, ende sijn hant roeren.