Den gheheelen Bybel, Inhoudende het oude ende nieuwe Testament (Leuvense bijbel 1548)

Dat ierste Capittel.

1

⁺DWOERT des Heeren dat ghesciet is tot Sophoniam den sone Chusi, des soons Godolie, des soons Amarie, des soons Ezechie, in die daghen van Iosias Amons sone des conincs van Iuda.

+ A

2

Verghaderende sal ict al vergaderen van daensicht der eerden, seyt die Heere.

3

Vergaderende den mensch ende tvee, vergaderende dat gheuogelte des hemels ende die visschen der zee, ende der ongoddelijcker sullen vallinghen wesen, ende ick sal die menschen vernielen van daensicht der eerden, seyt die Heere.

4

Ende ick sal mijn hant wtsteken op Iudam, ende op alle die bewoonders van Ierusalem, ende ick sal van deser plaetsen te niete doen die bleuelinghen van Baal, ende die namen der tempel bewaerders metten priesters,

5

ende die ghene die op die daken aenbidden dat heyr des hemels, ⁺ende aenbidden ende sweren by den Heere, ende sweren by Melchom.

+ B

6

Ende die hen affkeeren van achter den rugghe des Heeren, ende die den Heere niet gesocht en hebben, noch hem onderuraecht en hebben

7

Swijcht van daenschijn des Heeren Gods, want des Heeren dach is by, want die Heere heeft een slachofferande bereydt, hy heeft sijn gheroepene gheheylicht.

8

Ende tsal wesen inden dach van des Heeren slachofferande, dat ick sal versoecken op die princen ende op des conincs sonen, ende op alle die ghene die ghecleedt zijn met vreemde cleedinghe,

9

ende ick sal versoecken op een ieghelijcken die vermetelijc wandelt opden dorpel op dien dach, die thuys des Heeren haers Gods veruullen met ongherechticheyt ende bedroch.

10

⁺Ende in dien dach, seyt die Heere, sal wesen een stemme des gheroeps van die poorte der visschen, ende een ghehuyl van die tweede, ende een groote vernielinghe van die hueuelen.

+ C

11

Huylt ghi bewoonders van Pile, alle tvolc van Chanaan heeft ghesweghen, Sij sijn alle vergaen die omwonden waren met siluer.

12

Ende tsal wesen in dien tijt, ick sal Ierusalem ondersoecken met lichters, ende ic sal versoecken op die mannen die gheuesticht zijn in hen drecken, die in hen herten segghen. Die Heere en sal niet wel doen ende hy en sal niet qualijc doen,

13

Ende hen stercheyt sal wesen tot een beroouinghe, ende hen huysen tot een woestijne. Ende si sullen huysen timmeren, ende die niet bewoonen, ende sij sullen wijngaerden planten ende haren wijn niet drincken.

14

Den grooten dach des Heeren is nae by, hy is nae by, ⁺ende wtermaten seer snel, Die stemme van des Heeren dach is bitter, daer sal die stercke ghepijnicht worden,

+ D

15

Dien dach is eenen dach der gramscappen, eenen dach der tribulatien ende der benautheyt, den dach der verderffenissen ende der allendicheyt, den dach der duystenissen ende der donckerheyt, den dach des neuels ende des onweders,

16

den dach des trompets ende des gheclancs op die besloten steden, ende op die hooghe hoecken.

17

Ende ick sal die menschen quellen, ende si sullen wandelen als blende, want si hebben den Heere ghesondicht, ende hen bloet sal wtghestort worden ghelijck eerde ende hen lichamen als drecken.

18

Maer oock soo sal hen siluer ende hen gout hen niet moghen verlossen in den dach van des Heeren gramscap, met den viere van sijnen heeten torn sal tgheheel eertrijck verslint worden, want hy sal een voleyndinghe met haesten maken alle den ghenen die deerde bewoonen.