Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .iij. Capittel.

1

⁺VVee ghy verwecstere ende verloste stadt ghy duyue,

+ A

2

Sij en heeft die stemme niet gehoort, ende si en heeft dat castijende onderwijs niet ontfanghen, inden Heere en heeft sij haer niet betrout, tot haren God en heeft si niet ghenaect

3

Haer princen int midden van haer waren als briesschende leeuwen, haer rechters waren als woluen des auonts, si en lieten niet ouer tot smorghens toe.

4

Haer propheten waren ontsinnich, onghetrouwe mannen, haer priesters hebben het heylich besmedt, si hebben onrechtuerdelijc ghedaen teghen die wet,

5

Die rechtuerdige Heere int midden van haer en sal gheen ongherechticheyt doen, vroech vroech sal hy sijn ordeel int licht gheuen, ende ten sal niet verborghen wesen, ende die ongherechtighe en heeft die bescaemtheyt niet gheweten.

6

Ick heb die Heydenen vernielt, ende hen hoecken zijn ghebroken, hen weghen heb ick woest ghemaect, midts datter niemant en is die daer door gae, hen steden sijn verwoest want daer gheen man bleuen en is oft bewoonder.

7

⁺Ic hebt gheseyt, maer nochtans suldi my vreesen, ghy sult castijnghe ontfanghen, ende haer wooninghe en sal niet vergaen, om alle die dinghen in die welcke icse versocht hebbe, maer nochtans inden dagheraet opstaende hebben si alle hen ghedachten quaet ghemaect.

+ B

8

Daer om verbeyt my, seyt die Heere, inden dach van mijnder verrijsenissen int toecomende, want tis mijn ordeel dat ick vergaderen sal die Heydenen, ende versamen die conincrijcken, ende ick sal op hen wtstorten mijn verbolghentheyt, alle die gramscap van mijnen rasenden toren, want int vier van mijn gramme liefde sal alle daertrijck verslint worden,

9

want dan sal ick den volcken een wtuercoren lippen gheuen, dat sij allegader aenroepen sullen inden naem des Heeren, ende hem dienen met eender scoudere.

10

Ouer die vloeden van dat Morianen lant, van daer sullen mijn ootmoedighe kinderen van mijnen verstroeyden my een gaue brenghen.

11

In dien dach en suldi niet bescaemt wesen ouer alle uwe vonden, met de welcke ghy teghen my ouertreden hebt, ⁺want dan sal ick vant midden van v wechnemen die hoochsprekers van uwer hoouerdie, ende ghy en sult niet meer daer toe doen om voorts verheuen te worden in mijnen heylighen berch

+ C

12

Ende ick sal int midden van v laten een arm ende behoeuich volck, ende si sullen hopen inden naem des Heeren.

13

Die bleuelinghen van Israel en sullen gheen ongherechticheyt doen, noch si en sullen gheen loghentael spreken, ende in haeren mont en sal gheen bedrieghelijcke tonghe gheuonden werden, want si sullen weyden ende rusten, ende daer en sal niemant wesen diese veruaere.

14

Loeft ghy dochter van Sion, maect iolijt Israel, verblijt ende verhuecht v met allen v herte ghy dochter van Ierusalem.

15

Die Heere heeft v ordeel wechghenomen, hy heeft v vianden afgekeert Die coninck van Israel die Heere is int midden van v, ghy en sult voorts gheen quaet vreesen,

16

⁺In dien dach salmen tot Ierusalem segghen. En wilt niet vreesen Sion, En laet v handen niet slap werden,

+ D

17

die Heere v Godt is int midden v sterck, hy sal behouden, hy sal op v blijde sijn met blijscap, hy sal swijghen in v liefde, hy sal hem op v verhueghen met loue.

18

Die ydele die vander wet ghesceyden waren, sal ick vergaderen, want sij waren wt v, dat ghy voortaen niet meer gheen verwijdt van hen en hebt.

19

Siet ick salse alle dooden die v lijden aenghedaen hebben in dien tijt, ende ick sal den cruepelen behouden, ende haer die wt gheworpen was sal ick verghaderen, ende ic salse stellen tot lof, ende tot eenen naem, in alle dlant van hen bescaemtheyt.

20

In dien tijt dat ic v lieden sal aenbrenghen, ende inden tijt dat ick v vergaderen sal, want ick sal v lieden gheuen tot eenen naem, ende tot lof alle den volcken der eerden, als ick uwe gheuanghenisse sal wederom ghekeert hebben voor uwe ooghen, seyt die Heere.

Hier voleyndt die Propheet Sophonias.