Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .ij. Capittel.

1

⁺OP mijn hoede sal ick staen, ende ick sal mijnen ganck vast maken op die stercte, ende ic sal bescouwen, op dat ic sien mach, wat my gheseyt wordt, ende wat ick antwoorden sal tot den ghenen die my berispt.

+ A

2

Ende die Heere heeft my gheantwoert, ende gheseyt, Scrijft het visioen, ende legt dat breedt wt op die scrijftafelkens, op dat hijt ouerloope die dat leest.

3

Want het visioen is noch verre, ende tsal openbaren ten eynde, ende ten sal niet lieghen, ist dattet toeft, soe verwacht dat, want het sal comende comen, ende en sal niet toeuen.

4

Siet die ongheloouich is diens ziele en sal niet recht sijn in sij seluen, maer die rechtuerdighe sal in sijn ghelooue leuen.

5

Ende ghelijck den wijn den ghenen dien drinct bedriecht, alsoe sal een hoouerdich man sijn, ende hi en sal niet verciert worden, die zijn ziele als in die helle verbreydt heeft, ende hy is ghelijck die doot, ende hy en wort niet veruult, ende hy heeft tot hem vergadert alle die heydenen, ⁺ende tot hem ghehoopt alle volcken.

+ B

6

En sullen alle dese op hem niet een ghelijckenisse nemen, ende die sprake van sijn gheraetselen, ende men sal segghen. Wee hem die vermenicfuldicht, dat sijne niet en is? Hoe langhe beswaert hy ooc teghen sijn seluen dick slijck?

7

en sullen sij niet onuersienlijck opstaen, die v bijten sullen, ende en sullen sij niet ghewect worden die v verscoeren, ende ghy sult hen tot eenen roof wesen?

8

Want ghy hebt veel volcken berooft, soo sullen sij v alle beroouen die daer ouerghebleuen sullen wesen vanden volcken, om des menschen bloet, ende om die boosheyt des lants der stadt, ende alle der gheender die daer in woonen.

9

Wee den ghenen die quade ghiericheyt vergadert voer sijnen huyse, dat sijnen nest mocht int hooghe wesen, ende hy meynt dat hy verlost wort wt die hant des quaets.

10

⁺Ghy hebt uwen huyse bescaemtheyt ghedacht, ghy hebt veel volcken heel in stucken ghehouwen, ende v ziele heeft ghesondicht.

+ C

11

Want den steen sal wten muer roepen, ende het hout dat onder die ghebintselen der timmeragien is, sal antwoerden,

12

wee die een stadt timmert in dbloedt, ende bereydt een stadt met boosheyt.

13

En sijn dese dinghen niet van den Heere der heyrscaren? Want die volcken sullen arbeyden in veel viers, ende die Heydenen te vergheefs, ende sij sullen ghebreken.

14

Want het lant sal veruult werden dat sij kennen souden die glorie des Heeren, als wateren die zee ouerdeckende.

15

Wee die sijnen vrient te drincken gheeft, doende zijn galle daer inne ende droncken makende, om dat hy sijn naectheyt sien soude.

16

Ghy sijt veruult met scanden voer glorie, drinct ghy oock ende ontslaept, den kelck van des Heeren rechter hant sal v omuanghen, ende die wtbrakinghe der scanden op uwe glorie.

17

Want die boosheyt van Libanus sal v ouerdecken, ⁺ende die verwoestheyt der dieren salse veruaeren van des menschen bloet, ende van die boosheyt der eerden, ende der stadt, ende alle der gheender die daer in woonen.

+ D

18

Wat helpt het ghesneden beelt, dat sijn maker dat ghesneden heeft, dat ghegoten, ende bedrieghelijck beelt? dat sijn makere int maecsele ghehoept heeft, dat hy stomme affgods beelden maken soude.

19

Wee die den houte seyt, Ontspringt, Staet op den swijghenden steen, meyndi dat hijt sal moghen leeren? Siet dese is ouerdect met goude ende siluere, ende daer en is gheenen gheest in zijn binnenste.

20

Maer die Heere is in sijnen heylighen tempel, laet van sijn aensicht swijghen gheheel aertrijck.