Den gheheelen Bybel, Inhoudende het oude ende nieuwe Testament (Leuvense bijbel 1548)

Dat ierste Capittel.

1

⁺DEn last die Habacuc die Propheet ghesien heeft,

+ A

2

Heere hoe langhe sal ick roepen ende ghi en sult niet verhooren? hoe langhe sal ick tot v crysschen ghewelt lijdende, ende ghi en sult niet salich maken?

3

Waer om hebdi my die boosheyt ghetoont ende den arbeyt, om te sien den roof ende die ongherechticheyt teghen my? Waer om aensiedt ghy die versmaders, ende swijght als die ongoddelijcke vertreedt den ghenen die rechtuerdigher is dan hy? ⁺Ende sult ghy die menschen maken als die visschen der zee, ende als cruypende ghedierte die gheenen leytsman en hebben? ende het ordeel is ghedaen, ende dat wedersegghen is machtigher.

+ B

4

Daer om is die wet verscoert, ende het ordeel en is ten eynde niet ghecomen, want die ongoddelijcke heeft die ouerhant teghen den rechtuerdighen, daer om gaet daer een verkeert ordeel wt.

5

Ansiet onder die Heydenen ende besiet, ende verwondert v, ende wert verbaest, want daer is een werck ghedaen in uwe daghen, dwelck niemant gheloouen en sal als vertelt sal worden.

6

Want siet ick sal die Chaldeen verwecken, een bitter ende snel volck, wandelende op die breetheyt der eerden om dat besitten soude die tabernakelen die sijne niet en zijn.

7

⁺Het is grouwelijck ende veruaerlijck, wt hem seluen sal zijn ordeel ende last comen.

+ C

8

Sijn peerden zijn lichter dan lupaerden, ende rasscher dan die auont woluen, ende hen rosvolck sal verre wt ghesprayt worden. Want zijn rosvolck sal van verre comen, zij sullen vlieghen als den aernt haestende om teten.

9

Sy sullen alle totten rooue comen, hen aensicht sal eenen brandenden wint zijn, ende hy sal als tsandt die gheuanghenisse vergaderen.

10

Ende hy sal van die coninghen triumpheren, ende die tyrannen sullen sijn ghecsmaren sijn hy sal op alle die stercten lachen, ende hy sal eenen dijck te hoop brenghen, ende die innemen.

11

Dan sal den gheest verandert worden ende doergaen, ende hy sal vallen, dese zijn stercheyt is zijns Godts.

[p. *707]

12

En sijdi ghy niet van tbeghinsel Heere mijn Godt mijn heylighe, ende wy en sullen niet steruen? Heere ghi hebt hem tot een ordeel ghestelt, ende den stercken hebdi ghefundert om dat ghi hem straffen soudt.

13

V ooghen sijn suyuer, dat ghi gheen quaet sien en soudt, ende ghy en sult niet moghen sien tot die boosheyt. Waer om siedt ghy niet op die ghene die boose dinghen doen, ende waer om swijchdi als die ongoddelijcke verslint den ghenen die rechtuerdigher is dan hy?

14

⁺Ende ghy sult die menschen maken als visschen der zee, ende als cruypende ghedierte dat gheenen prince en heeft.

+ D

15

Hy heuet gheheel metten anghel opghehauen, hy heuet ghetrocken in sijn vischnet, ende hy heuet vergadert in sijn net. Daer om sal hi blijde sijn ende hem verhueghen

16

daerom sal hy sijne vischnet slachoffer offeren ende sijnen nette sacrificie doen, want daer in is sijn deel vet gheworden, ende sijn spijse is wtuercoren.

17

Daerom heeft hy dan sijn vischnet wtghespraeyt, ende hi en sal niet sparen altijt die heydenen doot te slaen.