Den gheheelen Bybel, Inhoudende het oude ende nieuwe Testament (Leuvense bijbel 1548)

1

Habacucs ghebedt voer die onwetentheden.

Dat .iij. Capittel.

2

⁺HEere ic heb v ghehoor ghehoort, ende ick heb ghevreest. Heere v werck is int midden der iaren, maect dat leuende int midden der iaren suldijt bekent maken, als ghy sult gram wesen, soo suldi der bermherticheyt ghedencken.

+ A

3

Godt sal van den suyden comen, ende die heylighe van den berch Pharan. Altijt. Sijn glorie heeft die hemelen bedect, ende die eerde is vol van sijnen loff.

4

Sijn scijnsel sal als een licht sijn, hoornen sijn in sijn handen, daer is sijn stercheyt verborghen.

5

Voer sijn aensicht sal die doot gaen, ende die duyuel sal voer sijn voeten wtgaen.

6

Hy heeft ghestaen ende die eerde ghemeten, hi heeft aensien ende van een ghesceyden die Heydenen, ende die berghen der werelt zijn vernielt, die hueuelen der werelt sijn nederghecromt, ⁺van die weghen sijnder eewicheyt.

+ B

7

Om die boosheyt heb ick ghesien die tenten van der Morianen lant, die vellen des lants van Madian sullen verstoort werden.

8

Sydie teghen die vloeden gram O Heere? oft is v rasende gramscap op die vloeden? oft v verbolghentheyt in die zee, die op v peerden climt, ende v waghenen sijn behoudenisse?

9

Verweckende suldi uwen boghe verwecken, die eeden den gheslachten, die ghy ghesproken hebt. Altijt, Ghy sult die vloeden der eerden snyden.

10

⁺Die berghen hebben v ghesien, ende sijn droeuich gheweest, den stroem der wateren is ouerghegaen. Den affgront heeft sijn stemme ghegheuen, die hoocheyt heeft haer handen op ghehauen.

+ C

11

Die sonne ende die mane hebben ghestaen in hen woonstede, int licht van uwen pijlen sullen sy gaen, in dat blincsel van uwer blinckender speren.

12

Met een grimmighe suldi die eerde vertreden, in die rasende gramscap suldy die Heydenen verbaest maken.

[p. *708]

13

Ghy sijt wtghegaen ter salicheyt ws volcks, ter salicheyt met uwen ghesalfden, ghy hebt het hooft gheslaghen van des ongoddelijcs huys, ghy hebt het fundament ghebloodt totten hals toe. Altijt.

14

Ghy hebt sijn scepteren vermalendijt, den hoofde van sijnen orloochs volc, comende als eenen stormenden wint om my te verstroeyen, hen verhuegen is ghelijc van eenen die den armen verslint int verborghen.

15

⁺Ghy hebt in die zee eenen wech ghemaect uwen peerden, int slijck van veel wateren.

+ D

16

Ick hebt ghehoort ende mijnen buyck is heel ontstelt gheweest, van die stemme hebben mijn lippen ghebeeft, laet den etter in mijn beenderen gaen, ende laetet onder my wt loopen, op dat ick mach rusten inden dach der tribulacien, dat ick mach op climmen tot ons ghegort volck.

17

Want den vijchboom en sal niet bloeyen, ende daer en sal gheen groeytsel wesen in die wijngaerden, het werck vanden olijfboom sal lieghen, ende die velden en sullen gheen spijse voort brenghen, dat cleyn vee sal vanden scaepstal afghesneden werden, ende daer en sal gheen groot vee wesen aen die cribben.

18

Maer ick sal inden Heere blijde sijn, ende ick sal my verhueghen in Gode mijnen Iesus.

19

Godt die Heere is mijn stercheyt, ende hy sal mijn voeten stellen als der herten, ende die verwinner sal my leyden op mijn hoochden singhende met psalmen.

Hier voleyndt die Propheet Habacuc.