Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .ij. Capittel.

1

⁺HY is opgheclommen die voer v verstroeyen sal, die belegghinghe bewaren sal, aenscouwet den wech, versterct die lendenen, maect die cracht seer vroem,

+ A

2

want die Heere heeft Iacobs houerdie vergouden ghelijck die houerdie van Israel, Want die verwoesters hebbense verstroyt, ende hen rancken hebben sij verdoruen.

3

Den scilt van sijnen stercken is vierich, die mannen des heyrs sijn in roode cleederen, die ghetuyghen vanden waghen sijn vierich, inden dach van sijn bereydinghe, ende die drijuers sijn ontslapen.

4

In die weghen sijn sij verstoort gheweest, ⁺die waghenen sijn in stucken ghestooten in die straten hen aensien es ghelijc lampen als blixemen allesins loopende.

+ B

5

Hy sal zijnder stercker ghedencken, sij sullen vallen in hen weghen, sij sullen haestelijck op hen mueren climmen, ende die lommer tente sal bereyt werden.

6

Die poorten der vloeden sijn open ghedaen, ende den tempel totter eerden toe affghebroken.

7

Ende die ruyter is gheuanghen wech gheleydt, ende haer dienstvrouwen worden ghedreuen, suchtende als duyuen, murmurerende in hen herten.

8

Ende Niniue, als een visscherie der wateren sijn haer wateren, ⁺maer sij hebben ghevloden, staet, staet, ende daer en is niemant die wederkeere.

+ C

9

Rooft het siluer, rooft het gout, ende daer en is gheen eynde der rijcdommen van alle die lustighe vaten diemen begheeren mochte.

10

Sy is ghebroken, ende ghespleten, ende verscoert, ende het herte is verdwijnende, ende daer is een lammicheyt der knyen, ende een ontbreken in alle die nieren. Ende die aensichten van hen allen sijn als die swaertheyt vanden potte.

11

Waer is die wooninghe der leuwen? ⁺ende die weyde van der leuwen welpens, waer toe dat die leuw ghegaen is, dat hy daer binnen comen soude, dat welpen eens leuws, ende daer en is niemant diese veruaere?

+ D

12

Die leuw heeft ghenoech gheuanghen voer sijn ionghen, ende hi heuet voer sijn leuwinnen ghedoodt, ende hy heeft sijn speluncken metten roof veruult, ende sijn rustplaetse met buete.

13

Siet ic tot v seyt die Heere der heyrscaren, ende ick sal ontsteken totten roock uwe waghenen, ende tsweert sal v leukens eten, ende ic sal uwen roof vander eerden verdrijuen, ende die stemme van uwen boden en sal niet meer ghehoort worden.