Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .iij. Capittel.

1

⁺VVee ghy bloedighe stadt gheheel vol van der loghenen verscoeringhe, den roof en sal van v niet gaen.

+ A

2

Dat gheluyt der gheesele, ende tgheluyt van tghedruysch der raderen, ende der wrinschender peerden, ende der hittigher waghenen, ende der rijders daer opclimmende.

3

Ende der blinckender sweerden, ende der blixemender spiessen, ende der verslaghender menichten, ende des swaren vals, ende daer en is gheen eynde der dooder lichaemen, ende sij sullen vallen ouer hen lichamen.

4

Om die menichte van die oncuyscheden der schoonder ende aen ghenamer hoeren die toouerien heeft, die de Heydenen vercocht heeft in haer oncuyscheden, ende die gheslachten in haer toouerien,

[p. *706]

5

Siet ick come tot v, seyt die Heere der heyrscaren, ende ick sal v scamelheden ontdecken in v aensicht, ende ick sal den Heydenen v naectheyt toonen, ende den conincrijcken v scandelijcheyt,

6

ende ick sal op v worpen die affgrijsselijcheden, ende ick sal v versmaetheden aendoen, ende ick sal v stellen tot een exempel.

7

Ende tsal sijn dat alle die v siet, sal van v vlieden ende segghe, Niniue is verdoruen, wie sal thooft op v scudden? ⁺Van waer sal ick v eenen trooster soecken?

+ B

8

Sijt ghy beter dan Alexandria der volcken, die in die vloeden woont? die wateren sijn rontsomme haer, wiens rijcdommen sijn die zee, die wateren sijn haer mueren.

9

Dat Morianen lant, is haer stercheyt, ende Egypten, ende daer en is gheen eynde. Aphrica ende die Libianen hebben in v hulpe gheweest.

10

Maer die is selue oock in die ouervoeringhe gheleyt in die gheuanghenisse. Haer cleyn kinderen zijn doot ghestooten int hooft van allen straten, ende op hen edele hebben sij dlot gheworpen, ende allen hen ouerste luyden zijn vast ghestelt in veteren.

11

Ende daer om sult ghy oock droncken ghemaect worden, ende versmaet wesen, ende ghy sult hulpe soecken vanden viant.

12

⁺Alle uwe stercten zijn als die vijchboomen met haren vroeghe vijghen, ist dat sij ghescudt worden, soo sullen sij vallen in den mont des eters.

+ C

13

Siet v volck is als vrouwen int midden van v, die poorten ws lants sullen uwen vianden ter openinghen ontploken worden, tvier sal v grendelen verslinden.

14

Scept voer v seluen water om die belegghinghe, richt op v bolwercken, gaet int slijck, ende treedet, ondertredende houdt den bacsteen.

15

Daer sal v tvier eten ghy sult metten sweerde vergaen, het sal v verslinden als den cruyt worm. Wert vergadert als die cruyt wormen, wert vermenichfuldicht als die sprinchanen.

16

Ghy hebt v comenscappen meer ghedaen, dan die sterren des hemels zijn, ⁺den cruyt worm heeft hem wt ghespreyt, ende is wech ghevloghen.

+ D

17

V hoeders waren als sprinchanen, ende v cleyn kinderen als die sprinchanen der sprinchanen, die hem betrouwen in die tuynen in den dach der couden, die sonne is opghestaen ende sij zijn wech ghevloghen, ende hen plaetse en is niet bekent gheweest waer sij gheweest hebben.

18

V herders hebben ghesluymert coninck van Assur, v princen sullen begrauen worden, v volck heeft verborghen gheweest in die berghen, ende daer en is niemant diese vergadere.

19

V vernielinghe en is niet duyster, v wonde is dalderquaetste, alle die v ghehoor ghehoort hebben die hebben hen hant tsamen ghedruct ouer v. Want ouer wien en heeft v quaetheyt altijt niet ghedaen?

Hier voleynt die Propheet Nahum.