Den gheheelen Bybel, Inhoudende het oude ende nieuwe Testament (Leuvense bijbel 1548)

Dat ierste Capittel.

1

⁺DEn last van Niniue. Den boeck des visioens van Nahum Den Elceseus.

+ A

2

Godt is Ialours ende een wrekende Heere, een wrekende Heere, ende hebbende rasenden toren, een wrekende Heere teghen zijn vianden, ende hy selue es gram op zijn vianden.

3

Die Heere is verduldich, ende groot van stercheyt, ende suyuerende en sal hy niet onnoosel maken. Die Heere in tempeest ende stormende wint sijn zijn weghen, ende die neuelen zijn tghestubbe van sijnen voeten,

4

straffende die zee ende die verdrooghende, ⁺ende alle die vloeden tot die woestijne brenghende. Basan is cranck gheworden, ende Carmelus, ende die bloeme van Libanus is verdwenen.

+ B

5

Die berghen zijn beroert van hem, ende die hueuelen sijn verwoest, ende die eerde heeft ghebeeft van zijn aensicht, ende die werelt, ende alle die daer in woonen.

6

Wie sal voer daensicht van sijn verbolghentheyt staen? ende wie sal wederstaen in die gramscap van sijnen rasenden torn? Sijn verbolghentheyt is wtghestort als een vier, ende die steenrootsen zijn ghesmolten van hem.

7

Die Heere is goet, ende versterckende inden dach der tribulacien, ende wetende die ghene die op hem hopen,

8

⁺ende inden voerbygaende ouervloet sal hy een voleyndinghe maken van sijn plaetse, ende die duysternissen sullen sijn vianden veruolghen.

+ C

9

Wat denct ghy lieden teghen den Heere? Hy sal een volendinghe maken. Daer en sal gheen dobbel tribulatie opstaen.

10

Want ghelijck die dornen malcanderen omuanghen, alsoo is den maeltijt van hen die tsamen drincken, sij sullen vernielt worden als die stoppele vol droocheyts.

11

Wt v sal wt gaen die quaetheyt denct tseghen den Heere, metter herten ouerlegghende ouertredinghe.

12

Dit seyt die Heere, Ist dat sij volmaect sijn, ende alsoe vele, ⁺soo sullen sij aldus heel ghescoren werden, ende hy sal doergaen, ick heb v ghecastijt, ende ick en sal v voerts niet meer castijden.

+ D

13

Ende ick sal nu sijn roede breken van uwen rugghe, ende v banden sal ick van een trecken.

14

Ende die Heere sal ouer v ghebieden, wt uwen naem en sal niet meer ghesaeyt werden, van ws Heeren huys sal ick het ghesneden, ende ghegoten beelt dooden, ick sal v graff stellen, want ghy sijt ongheeert.

15

Siet op die berghen sijn die voeten vanden ghenen die blijde bootscap brengt ende vercondicht den vrede Iuda viert v feestdaghen, ende betaelt v beloften, want hy en sal niet meer daer toe doen dat Belial in v doergae, hy is gheheel te niete ghegaen.