Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .vi. Capittel.

1

⁺HOort wat die Heere spreect. Staet op, kijft int recht tegen die bergen, ende laet die hueuelen v stemme hooren.

+ A

2

Laet die berghen des Heeren ordeel hooren, ende die stercke fundamenten der eerden, want des Heeren ordeel is met sijnen volcke, ende met Israel sal hy gheordeelt worden.

3

Mijn volck wat heb ick v ghedaen, oft wat heb ick v quellijck gheweest? antwoert my.

4

Want ick heb v wtgheleyt wten lande van Egypten, ende wten huyse der slauen hebbe ick v verlost, ende ick heb voer v aensicht ghesonden Moysen ende Aaron, ende Mariam?

5

Mijn volck weest (bid ick) ghedachtich wat Balach die coninck van Moab dachte, ⁺ende wat hem antwoerde Balaam Beors sone, van Setim tot Galgalam toe, dat ghy Godts rechtuerdicheden kennen soudt.

+ B

6

Wat sal ick weerdichs den Heere offeren, sal ick die knye buyghen den hooghen Godt? sal ick hem brantofferen ende iarighe calueren offeren?

7

Mach die Heere versoent werden doer die duysenden der rammen, oft in veel duysenden der vetter bocken? sal ick mijnen iersten gheboren gheuen voer mijn groot misdaet, die vrucht mijns buycs, voer die sonde mijnder zielen?

8

Ick sal v o mensch te kennen gheuen, wat goet is, ende wat die Heere van v begheert. Voerwaer recht te doen, ende bermherticheyt te beminnen, ⁺ende sorchuuldichlijck te wandelen met uwen Godt.

+ C

9

Des Heeren stemme roept tot die stadt, ende salicheyt sal wesen den ghenen die uwen naem vreesen, hoort ghy gheslachten, ende wie sal dat prijsen?

10

Alnoch ist vier in thuys vanden ongoddelijcken, die scatten der boosheyt, ende een minder mate vol gramscappen.

11

Sal ick die onrechte waghe rechtuerdich maken, ende die bedrieghelijcke ghewichten des farkens?

12

doer die welcke haer rijcke lieden veruult sijn met ongherechticheyt, ende die ghene die daer in woonen spraken loghentale, ende hen tonghe is bedrieghelijck in haeren mont.

13

Ende daer om heb ick v begonst te slaen met verderffenisse, om uwe sonden.

14

⁺Ghy sult eten ende niet versaedt werden, ende v vernederinghe is int midden van v, ende ghy sult aengrijpen, ende niet behouden, ende die ghy behouden sult die sal ick ten sweerde gheuen.

+ D

15

Ghy sult saeyen ende niet maeyen, ghy sult die oliuetten treden, ende metter olien niet ghesmeert werden, ende ghi sult den most treden, ende den wijn niet drincken.

16

Ende ghy hebt bewaert die gheboden van Amri, ende alle dwerck des huys van Achab, ende ghy hebt ghewandelt in hen wellusticheden, op dat ick v gheuen soude ter verderffenissen, ende die daer in woonen tot eenen spot, ende mijns volcs verwijt suldi draghen.