Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .v. Capittel.

1

⁺NV suldi verdoruen worden ghy mordenaers dochter, sij hebben een belegghinghe ghestelt op ons, met der roede sullen sij slaen die wanghe des rechters van Israel.

+ A

2

Ende ghy Bethleem Ephrata, ghy sijt seer cleyn in die duysenden van Iuda, wt v sal my wtgaen, die een heerscapper sal sijn in Israel. Ende sijnen wtganck is vanden beghinsel van die daghen der eewicheyt.

3

Daerom sal hijse gheuen tot den tijt, inden welcken die in barens noode es baren sal, die bleuelinghen van sijnen broederen sullen bekeert worden tot die kinderen van Israel.

4

⁺Ende hy sal staen, ende sal voeden in die stercheyt des Heeren, in die hoocheyt des naems van den Heere sijnen Godt, ende sij sullen bekeert worden, want hy sal nu groot ghemaect worden tot die palen der aerden.

+ B

5

Ende dese sal den vrede wesen, als die Assirier comen sal in ons landt, ende als hy treden sal in onse huysen, ende wy sullen op hem verwecken seuen herders, ende acht heerlijcke vorsten.

6

Ende sij sullen dlant van Assur weyden metten sweerde, ende dlant van Nemrod met zijn lancien, ende hy sal van Assur verlossen, ⁺als hy in ons lant comen sal, ende als hy treden sal in onse palen,

+ C

7

ende die bleuelinghen van Iacob sullen wesen int midden van veel volcken, als den dauw vanden Heere, ende als druppelen opt cruyt die gheenen man en verwacht, ende niet en verbeyt nae die kinderen der menschen.

8

Ende die bleuelinghen van Iacob sullen wesen in die heydenen int midden van veel volcken, als den leuw onder die beesten der bosschen, ende als een welpen des leuws onder die cudden der scapen, ⁺die welcke als hy doergaet ende vertreedt ende vangt, soe en isser niemant, diet verlosse.

+ D

9

V hant sal verhauen worden op v vianden, ende alle v vianden sullen vergaen.

10

Ende tsal zijn in dien dach, seyt die Heere, dat ick v peerden sal wech halen wt het midden van v, ende ick sal v waghenen vernielen.

11

Ende ick sal verderuen die steden ws lants, ende alle uwe stercten sal ick verderuen, ende ick sal die toouerien wech nemen van v handt, ende die waerseggherien en sullen in v niet wesen.

[p. *704]

12

Ende ic sal v ghesneden affgoden doen vergaen, ende v staende beelden wt het midden van v, ende ghi en sult voerts niet meer die wercken uwer handen aenbidden.

13

Ende ick sal v bosschen wtroeyen wt het midden van v, ende ick sal v steden vernielen.

14

Ende ick sal met rasende gramscap ende met verbolghentheyt wrake doen aen alle die Heydenen die niet ghehoort en hebben.