Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .iiij. Capittel.

1

⁺ENde tsal wesen int wterste der daghen dat den berch des Heeren sal bereydt zijn op den tsop der berghen, ende hooghe bouen die hueuelen, ende die volcken sullen tot hem vlieden,

+ A

2

ende veel volcken sullen hen haesten ende segghen. Coemt ende laet ons opclimmen op des Heeren berch, ende tot den huyse des Gods van Iacob, ende hy sal ons leeren van sijnen weghen, ende wy sullen in sijn paden gaen, want van Sion sal die wet wtgaen, ende dwoert des Heeren van Ierusalem.

3

Ende hy sal ordeelen tusschen veel volcken, ende hy sal stercke volcken straffen zeer verre, ende sij sullen hen sweerden vermaken tot ploechcouteren, ⁺ende hen lancien tot spaden, het een volck en sal teghen het ander gheen sweert nemen, ende sij en sullen voertaen niet meer leeren orloghen.

+ B

4

Ende elck man sal sitten onder sijnen wijngaert, ende onder zijnen vijgheboom, ende daer en sal niemant wesen diese veruaere, want des Heeren der heyrscaren mont heuet ghesproken.

5

Want alle die volcken sullen wandelen een ieghelijck in sijns Gods naem, maer wij sullen wandelen inden naeme des Heeren ons Godts inder eewicheyt, ende immermeer.

6

In dien dach seyt die Heere, sal ick den crepel gaende vergaderen, ende haer die ick verstooten hadde, sal ick op nemen, ⁺ende die ick ghepijnicht hadde.

+ C

7

Ende ick sal den crepel gaende stellen tot bleuelinghen, ende haer die ghearbeyt hadde tot een machtich volck, ende die Heere sal ouer hen regneren opden berch van Sion, van nu ende tot inder eewicheyt.

8

Ende ghy torre der cudden, ghy neuelachtighe der dochter van Sion to v salt comen, ende dierste macht sal comen het rijck der dochter van Ierusalem.

9

Nu waer om wordi van droefheyt vercrompen? en hebdi gheenen coninck, oft is v raetsman vergaen, dat v die pijne beuanghen heeft als een vrouwe die in barens noode is?

10

Hebt wee ende arbeyt ghenoech ghy dochter van Sion, als een die in barens noode is, ⁺want ghy sult nu wter stad gaen, ende ghy sult int lantscap woonen, ende ghy sult comen tot Babilonien, daer suldi verlost werden. Daer sal v die Heere verlossen wt die hant uwer vianden.

+ D

11

Ende nu sijn op v veel heydenen vergadert, die segghen. Laetse ghesteent worden, ende laet ons ooghe op Sion sien.

12

Maer sij en hebben des Heeren ghedachten niet ghedacht, ende sij en hebben sijnen raet niet verstaen, want hy heeftse vergadert als het hoy vanden dorsch vloer.

13

Staet op, ende dorscht ghy dochter van Sion, want ic sal uwen horn yseren maken, ende v clauwen sal ic metalen maken, ende ghy sult veel volcken vernielen, ende ghi sult den Heere dooden, hen roouen, ende hen stercheyt den Heere van gheheel eertrijck.