Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .iij. Capittel.

1

⁺ENde ic heb gheseyt, Hoort ghi princen van Iacob, ende ghy vorsten des huys van Israel. En behooret v lieden niet toe het recht te weten,

+ A

2

die tgoet haet, ende tqueat bemint, die gheweldelijck hen huyt van bouen hen affneemt, ende hen vleesch bouen aff van haren vleesche?

3

Die mijns

[p. *703]

volcs vleesch gheten hebben, ⁺ende hebben hen vel bouen aff ghestroopt, ende hebben hen ghebeenten ghebroken, ende hebbense in stucken ghehouwen als in eenen metalen ketel, ende als vleesch int midden van eenen pot.

+ B

4

Dan sullen sij totten Heere roepen, ende hy en salse niet verhooren, ende hy sal sijn aensicht van hen verberghen in dien tijt, alsoo sij valschelijck ghedaen hebben in hen vonden.

5

Dit seyt die Heere op die Propheten die mijn volck verleyden, die met haren tanden bijten, ende vercondighen den vrede, ende ist datter iemant niet wat en gheeft in haren mont, soo heylighen sij op hem die orloghe.

6

Daer om sal v lieden den nacht voer een visioen wesen, ⁺ende die duysternissen sullen v wesen voer een waerseggherie, ende die sonne sal ondergaen op die propheten, ende den dach sal op hen verduystert werden.

+ C

7

Ende sij sullen bescaemt werden die visioenen sien, ende die waersegghers sullen bescaemt werden, ende sij sullen hen aensichten bedecken, om datter gheen antwoerde Gods en is.

8

Maer nochtans ick ben veruult met die stercheyt vanden gheest des Heeren, met ordeel ende cracht, dat ic Iacob soude hen groot misdaet vercondighen, ende Israel zijn sonde,

9

hoort dat ghy princen des huys van Iacob, ende rechters des huys van Israel, die dat ordeel versmaedt, ende alle rechte dinghen verkeert.

10

Die Sion timmert int bloet, ⁺ende Ierusalem in boosheyt.

+ D

11

Haer princen ordeelden om ghiften, ende haer priesters leerden om loon, ende haer Propheten propheteerden om ghelt, ende sij rusten op den Heere segghende. En is die Heere niet int midden van ons? Die quaden en sullen op ons niet comen.

12

Daer om sal ter saken van v lieden Sion als eenen acker gheackert werden, ende Ierusalem sal als eenen hoop steenen wesen, ende den berch des tempels tot hoochden der bosscagien.