Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .ij. Capittel.

1

⁺VVee v die onnutticheyt denct, ende werct quaet in v bedden, int licht vanden morghenstont doen sij dat, want hen hant is teghen Godt.

+ A

2

Ende sij hebben die ackeren begheert, ende gheweldichlijck ghenomen, ende sij hebben die huysen gherooft, ende sij deden onrecht den man ende sijnen huyse, den man, ende sijnder erffenisse.

3

Daer om dit seyt die Heere, Siet ick dencke op dese familie quaet, waer aff ghy v halsen niet trecken en sult, ende ghy en sult niet hoouerdich wandelen, want den tijt is seer quaet.

4

In dien dach sal op v lieden een parabel ghenomen werden, ⁺ende eenen sanck sal ghesonghen werden met soeticheyt der gheender die segghen sullen. Met verwoestinghe sijn wy verwoest. Het een deel mijns volcs is verwisselt. Hoe salt van my sceyden als hy wederkeert die onse lantscappen deylen souden?

+ B

5

Daer om en salder niemant sijn die v het zeelken der lotinghen worpe, in des Heeren vergaderinghe.

6

En spreect niet segghende, Ten sal op dese niet druypen, die bescaemtheyt en salse niet beuanghen,

7

Seyt het huys van Iacob. Is des Heeren gheest ghecort? oft sijn zijn ghedachten alsulcke? ⁺En sijn mijn woerden niet goet metten ghenen die recht wandelt?

+ C

8

Ende ter contrarien is mijn volck tot eenen weder partijder opghestaen, bouen den rock hebdi den mantel wech ghenomen, ende die ghene die simpelijck doerghinghen hebdi ter orloghen omghekeert.

9

Mijns volcs vrouwen hebdi wtghestooten wt die huysen van haren wellusticheden, van haren cleynen kinderen hebdi mijnen loff affghenomen, inder eewicheyt.

10

Staet op ende gaet, want ghi en hebt hier gheen ruste, om sijn onsuyuerheyt sal hy verdoruen worden met die alderquaetste verrottinghe.

11

⁺Och oft ick niet en ware een man den gheest hebbende, ende dat ick lieuer loghentale sprake. Ick sal v druyppen ten wijne, ende ter dronckenheyt, ende dit volck sal wesen die ghene daermen op druypt.

+ D

12

met een vergaderinghe sal ick v Iacob gheheel vergaderen, ick sal ouer een tsamen leyden die bleuelinghen van Israel, ick sal hem te samen stellen als een cudde inden scaepstal, als dat vee int midden der scaeps coyen, sij sullen gherucht maken van die menichte der menschen.

13

Want hy sal opclimmen, den wech opendoende voer henlieden, sij sullen sceyden, ende gaen doer die poorte, ende sij sullen doer haer wtgaen, ende hen coninck sal doergaen voer hen lieden, ende die Heere in henlieden hooft.