Den gheheelen Bybel, Inhoudende het oude ende nieuwe Testament (Leuvense bijbel 1548)

Dat ierste Capittel.

1

⁺DES Heeren woert dat ghesciedt is tot Micheam den Morasthiter. In die daghen Ioatham, Achaz ende Ezechie der coninghen van Iuda, dat hy ghesien heeft op Samarien, ende Ierusalem.

+ A

2

Hoort alle ghy volcken, ende laet die eerde ende haer volheyt aenmercken, ende die Heere Godt sij v lieden tot eenen ghetuyghe. Die Heere van sijnen heylighen tempel.

3

Want siet die Heere sal wtgaen van sijn plaetse, ende hy sal nederwaerts dalen, ende treden op die hoochden de eerden.

4

Ende die berghen sullen onder hem te niete gaen, ende die valleyen sullen ghedeylt worden, ⁺als het was van daensicht des viers, als wateren die steych nederwaerts loopen.

+ B

5

In Iacobs groot misdaet is dit al, ende in die sonden des huys van Israel, welck is Iacobs groot misdaet? en is dat niet Samarien? ende welck sijn die hoochden van Iuda? en is dat Ierusalem niet?

6

Ende ick sal Samarien stellen als eenen hoop steenen inden acker alsmen eenen wijngaert plant, ende ic sal haer steenen nederwaerts trecken in die valleye, ende sijn fundamenten sal ick ontdecken.

7

Ende alle sijn ghesneden beelden sullen in stucken ghehouwen werden, ende alle haer loonen sullen metten viere verbrant worden, ende alle hen affgoden sal ic stellen tot verderffenisse, want sij sijn van der hoeren loon vergadert, ⁺ende tot der hoeren loon sij weder keeren.

+ C

8

Daer op sal ic kermen ende huylen, ic sal berooft ende naect gaen, ick sal een ghecrijsch maken als der draken, ende een gheween als der struysen.

9

Want haer wonde is sonder hope van ghenesen, want sij is ghecomen tot Iuda sij heeft die poorte mijns volcs gheraect tot Ierusalem toe.

10

En willet in Geth niet vercondighen. En wilt met gheen tranen weenen, int huys des ghestubs bespraeyt v seluen met ghestubbe.

11

Ende gaet door voer v seluen ghy schoon wooninghe, bescaemdt met scande, sij en is niet wt ghegaen die inden wtganck woont. Dat ghescrey van der ghebuerinnen huys sal sij van v ontfanghen die voer haer seluen ghestaen heeft.

12

⁺Want sij is int goede cranck gheworden die in die bitterheden woont, want het quaet is nederghedaelt vanden Heere die poorten van Ierusalem.

+ D

13

Het ghedruysch van den waghen der verbaestheyt den bewoonder van Lachis. Dat beghinsel der sonden is der dochteren van Sion, want in v sijn die misdaden van Israel gheuonden.

14

Daerom sal hi die posten gheuen op die erffenisse van Geth, die huysen der loghenen tot een bedroch den coninghen van Israel.

15

Noch sal ick v eenen erffeghenaem aenbrenghen ghy die in Maresa woont, tot Odollam toe sal die glorie van Israel comen.

16

Wert caluwe, ende wert ghescoren, op die kinderen uwer wellusticheden, maect v caluheyt breet, als den arent, want sij sijn gheuanghen gheleyt wt v.