Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .vij. Capittel.

1

⁺VVee my want ick ben gheworden als die inden herft die crappen der wijnsnijdinghen vergadert, ende daer en is gheenen druyf om teten, vroechtijdeghe vighen heeft mijn ziele begheert.

+ A

2

Die heylighe is vander eerden vergaen, ende die oprechte en is onder die menschen niet, sij legghen alle laghen in dbloedt, die man iaecht sijnen broeder tot der doot.

3

Het quaet van haren handen segghen sij goet te sijne, die Prince eyscht, ende die rechter is int verghelden, ende die groote heeft die begheerte sijnder zielen ghesproken, ende sij hebbense verstoort.

4

Die de beste onder henlieden is, die is als den doornboom, ende die recht is als den dorn vanden thuyn, Den dach van uwer bescouwinghen, v besoeckinghe coemt, nu sal hen verwoestinghe wesen.

5

En wilt den vrint niet geloouen, ⁺ende en wilt v niet betrouwen opden vorst, van haer die in uwen schoodt slaept bewaert die sloten ws monts.

+ B

6

Want die sone doet sijnen vader versmaetheyt aen, ende die dochter staet op teghen haer moeder, die behoude dochter teghen haer sweerinne, ende des menschs vianden sijn zijn huysghenooten.

7

Maer ic sal tot den Heere aensien, ic sal verwachten Godt mijnen salichmakere, mijn God sal my hooren,

8

mijn viandinne en verblijdt v niet ouer my, om dat ic gheuallen ben, ic sal opstaen als ic in die duysternisse sal gheseten sijn. Die Heere is mijn licht.

9

Des Heeren torn sal ic dragen, want ic heb tegen hem ghesondicht, tot dat hi mijn sake ordeele, ende mijn recht doe, hi sal my wt leyden int licht, ic sal sijn rechtuerdicheyt sien.

10

Ende mijn viandinne salt aensien, ende sij sal bedect worden met bescaemtheyt, die tot my seyt. ⁺Waer is die Heere uwe God? Mijn ooghen sullen op haer sien, nu sal sij tot een vertredinghe wesen, als tslijck der straten.

+ C

11

Het is den dach dat v wanden souden vermaect worden, in dien dach sal die wet verre werden.

12

In dien dach sal ooc tot v Assur comen, ende tot die vaste steden, ende van die vaste steden totter vloet, ende tot die zee vander zee, ende totten berch vanden berch.

13

Ende dlant sal tot een verwoestinghe wesen om haer bewoonders, ende om die vrucht van haren ghedachten.

14

Voedt v volck met uwer roeden, dat cudde uwer erffenissen, die alleen woonen int wout, int midden van Carmelus, Basan ende Galaad sullen ghevoet werden nae die oude daghen.

15

Nae die daghen van uwen wt ganck wten lande van Egypten sal ic hem wonderlijcke dinghen toonen.

16

Die heydenen sullent sien, ⁺ende sij sullen bescaemt werden op allen hen stercheyt, sij sullen die hant opden mont legghen, hen ooren sullen doof sijn.

+ D

17

Sy sullen tghestubbe lecken als een serpent, als die cruypende dieren der eerden sullen sij wtghestoort worden wt haren woonsteden. Den Heere onsen Godt sullen sij begheren, ende sij sullen v vreesen.

18

Wat Godt isser ws ghelijck die de boosheyt afneemt, ende gaet voer by die sonde der bleuelinghen van uwer erffenissen? Hy en sal niet meer sijn rasende gramscap daer in seynden, want hi is willende die bermherticheyt.

19

Hy sal wederom keeren, ende onser ontfermen. Hy sal onse boosheden afflegghen, ende hy sal in die diepte vander zee alle onse sonden werpen.

20

Ghy sult Iacob die waerheyt gheuen, Abraham die bermherticheyt, die ghy onsen vaderen van die oude daghen ghesworen hebt.

Hier voleyndt die Propheet Micheas.