Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .iij. Capittel.

1

⁺ENde des Heeren woert is ghesciet tot Ionam ten tweeden male segghende.

+ A

2

Staet op ende gaet in die groote stadt Niniue, ende preect daer die prekinghe die ick tot v spreke.

3

Ende Ionas is opghestaen, ende is wech ghegaen tot in Niniue nae des Heeren woert. Ende Niniue was een groote stadt van drij dach reysen.

4

Ende Ionas begonst in die stadt te gaen tot een dachreyse, ende hy heeft gheroepen ende gheseyt. Noch veertich daghen ende Niniue sal omgheworpen werden.

5

⁺Ende die mannen van Niniue hebben in Gode ghelooft, ende sij hebben ghepreect datmen vasten soude, ende sij trocken sacken aen vanden meesten totten minsten.

+ B

6

Ende dwoert is ghecomen totten coninck van Niniue, ende hy is opghestaen van sijnen coninclijcken stoel, ende heeft sijn cleedt van hem aff gheworpen, ende hy heeft eenen sack aenghetrocken, ende hy heeft gheseten int dasschen.

7

Ende hy heeft gheroepen ende gheseyt, in Niniue, ⁺wt des conincs ende sijnder princen mont segghende. Die menschen ende die beesten, ende die runderen, ende het cleyn vee en salmen niet laten eten noch ghevoet werden, ende sij en sullen gheen water drincken.

+ C

8

Ende laet die menschen tsamen metten beesten, met sacken ouerdect worden, ende laetse roepen totten Heere sterckelijck, ende ieghelijck man bekeere hem van sijnen quaden weghe, ⁺ende van die boosheyt die in hen handen is.

+ D

9

Wie weet oft hem Godt omkeerde, ende dat hijt vergaue, ende dat hi wederkeerde van die rasende gramscap sijns torns, ende dat wy niet en verghighen?

10

Ende Godt heeft hen wercken ghesien, dat sij bekeert waren van haren quaden weghe, ende het heeft Gode ontfermt ouer die quaetheyt die hy ghesproken hadde henlieden te doen, ende hy en heuet niet ghedaen.