Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .ij. Capittel.

1

⁺ENde die Heere heeft eenen grooten visch bereydt dat hy Ionam opslocken soude. Ende Ionas was in des vischs buyck drij daghen ende drij nachten.

+ A

2

Ende Ionas heeft ghebeden totten Heere sijnen Godt, wt des vischs buyck

3

ende hy heeft gheseyt.

Ick heb gheroepen wt mijn tribulatie totten Heere, ⁺ende hi heeft my verhoort, wt den buyck der hellen heb ick gheroepen, ende ghy hebt mijn stemme verhoort.

+ B

4

Ende ghy hebt my gheworpen in die diepte int hert vander zee ende de vloet heeft my omuanghen, allen v water goluen, ende v baren sijn ouer my doer ghegaen.

5

Ende ick heb gheseyt, Ick ben verworpen van uwer ooghen aenscouwen, maer nochtans sal ick wederom sien uwen heylighen tempel.

6

⁺Die wateren hebben my omringhet totter zielen, den affgront heeft my omringhet, die zee heeft mijn hooft ouerdect.

+ C

7

Tot dat onderste der berghen ben ick nederghedaelt, die grendelen der eerden hebben my besloten inder eewicheyt, ende ghy sult mijn leuen opheffen van die verderffenisse Heere mijn Godt.

8

Als mijns ziele in my beanxt was, soo ben ic des Heeren ghedachtich gheweest, op dat mijn gebedt tot v come tot uwen heylighen tempel.

9

⁺Die die ydelheyden te vergheeffs bewaren, die verlaten sijn bermherticheyt.

+ D

10

Maer ick sal met die stemme des loofs v offerande doen, alle dat ick gheloeft hebbe, sal ic voer mijn salicheyt betalen den Heere.

11

Ende die Heere heeft den vische gheseyt, ende hy heeft Ionam wtghespoghen opt drooghe lant.