Den gheheelen Bybel, Inhoudende het oude ende nieuwe Testament (Leuvense bijbel 1548)

Dat ierste Capittel.

1

⁺ENde des Heeren woert is ghesciet tot Ionam den sone Amathi segghende,

+ A

2

Staet op ende gaet in die groote stadt Niniue, ende preect in haer, want haer quaetheyt is opghecomen voer my.

3

Ende Ionas is opghestaen dat hy vlieden soude in Tharsis van des Heeren aensicht, ende hy is nederghedaelt in Ioppen, ende heeft een scip gheuonden dat nae Tharsis voer, ende hy heeft diens sciploon ghegheuen, ende is daer in neder ghegaen, op dat hy met henlieden soude gaen tot Tharsis van des Heeren aensicht.

4

Maer die Heere heeft eeenen grooten wint ghesonden in die zee, ende daer is een groot tempeest opghestaen in die zee, ⁺ende het scip was in perikel van ghebroken te worden.

+ B

5

Ende die scipluyden hebben ghevreest, ende die mannen hebben tot haren Godt gheroepen, ende sij hebben die vaten die int scip waren in die zee gheworpen, op dat scip daer aff soude verlicht worden. Ende Ionas is nederwaerts ghedaelt tot dat binnenste des scips, ende sliep eenen swaren slaep.

6

Ende die stierman is tot hem ghecomen, ende heeft hem gheseyt, Waertoe wordet ghi vanden slaep verwonnen? Staet op ende aenroept uwen Godt, oft Godt by auontueren van ons dachte, ende dat wy niet verloren en ghinghen.

7

Ende deen man seyde tot sijnen medegheselle, Coemt ende laet ons loten, ende weten waer om dat ons dit quaet ghesciedt. Ende sij hebben loten ghewerpen, ende het lot is gheuallen op Ionam.

8

⁺Ende sij hebben tot hem gheseyt, Gheeft ons te kennen, ter saken van wien dat ons dit quaet ghesciet, wat is v werck? welck is v landt? ende waer henen gaet ghy? oft van wat volck sijt ghij?

+ C

9

Ende hy heeft tot hen gheseyt, Ick ben een Hebreusch man, ende den Heere den Godt des hemels vreese ick die ghemaect heeft die zee, ende dat drooghe lant.

10

Ende die mannen hebben ghevreest met een groote vreese, ende sij hebben tot hem geseyt. Waer om hebdi dit ghedaen? Want die mannen hebben ghekent dat hy van des Heeren aensicht vloodt, want hy haddet hen te kennen ghegheuen.

11

Ende sij hebben tot hem gheseyt, Wat sullen wy v doen, ende

[p. *701]

dat die zee ophoude van ons? Want die zee ghinck ende hief haer op.

12

Ende hy heeft tot henlieden gheseyt, Neemt my ende werpt my in die zee, ende die zee sal van v lieden op houden, want ick weet wel dat om mijnen wille dit groot tempeest ouer v lieden coemt.

13

Ende die mannen roeyden, dat sy weder ten drooghen lande souden comen, ende sij en conden niet, ⁺want die zee ghinck ende verhief haer teghen henlieden.

+ D

14

Ende sij hebben totten Heere gheroegen, ende gheseyt, Wy bidden Heere, dat wy niet en vergaen om die ziele van desen man, ende en gheeft op ons niet het onnoosel bloet. Want ghy Heere hebt ghedaen ghelijck ghi ghewilt hebt.

15

Ende sij hebben Ionam ghenomen, ende in die zee gheworpen, ende die zee heeft stille ghestaen van haren storm.

16

Ende die mannen hebben den Heere ghevreest met grooter vreesen, ende sij hebben den Heere slachofferanden gheoffert, ende beloften beloeft.