Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .iiij. Capittel.

1

⁺ENde Ionas heeft ghequelt gheweest met een groot verdriet, ende hi is gram gheweest,

+ A

2

ende heeft tot den Heere ghebeden ende gheseyt. Ic bidde v Heere, en is dit niet mijn woert doen ic noch in mijn lant was? daerom heb ick my te voren ghehaest dat ic vlieden soude in Tharsis, want ic weet dat ghy Godt goedertieren ende bermhertich sijt, verduldich ende van veel ontfermherticheden, ende vergeuende ouer die boosheyt.

3

Ende nu Heere neemt, dat bid ic v, mijn ziele van my, want die doot is my beter dan dleuen.

4

Ende die Heere heeft gheseyt. ⁺Meyndi ooc dat ghy wel te rechte gram sijt?

+ B

5

Ende Ionas is wter stadt ghegaen, ende hy heeft gheseten teghen het oosten vander stadt, ende hy heeft voer sij seluen daer een lommerhutteken ghemaect, ende hy heeft daer onder gheseten in die lommere, tot dat hi sien soude wat der stadt ghescieden soude.

6

Ende die Heere Godt heeft eert velt bereydt, ende dat is gheclommen bouen Ionas hooft, datter een scaduwe soude wesen op sijn hooft, ende hem bedecken, want hy hadde ghearbeyt, ⁺ende Ionas heeft blijde om dien eertvelt gheweest met een groote blijscap.

+ C

7

Ende die Heere heeft eenen worm bereydt int opgaen van den dagheraert teghen den morghen, ende dien heeft dat eertvelt ghequetst, ende het is verdroocht geweest.

8

Ende als die sonne opghegaen was, soe heeft die Heere eenen heeten, ende brandenden wint gheboden, ende die sonne heeft op Ionas hooft ghesteken, ende hy leedt groote hitte, ende hi heeft sijnder zielen begheert dat dat hi steruen soude, ende heeft gheseyt. Het is my beter te steruen dan te leuen.

9

⁺Ende die Here seydt tot Ionam. Meyndi ooc dat ghi wel te rechte gram sijt om dien eertvelt? Ende hy heeft gheseyt ic ben wel te rechte gram totter doot toe.

+ D

10

Ende die Heere heeft gheseyt, Ghy sijt bedroeft om dat eertvelt daer ghy niet aen ghearbeyt en hebt, noch ghedaen en hebt dattet wassen soude, dwelck binnen eenen nacht opghesproten is, ende op eenen nacht vergaen is.

11

Ende en sal ic Niniue die grooter stadt niet sparen, daer meer dan hondert ende twintich duysent menschen sijn, die niet en weten wat ondersceyt datter is tusschen hen rechte ende slincke hant, ende veel beesten?

Hier voleyndt die Propheet Ionas.