Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .viij. Capittel.

1

⁺DEse dinghen heeft my die Heere Godt ghetoont, ende siet een corffken met appelen.

+ A

2

Ende die Heere heeft tot my gheseyt. Het eynde is ghecomen op mijn volck Israel, Ic en salder niet meer toe doen dat ick doer hem gaen sal.

3

Ende die herren des tempels sullen kerren in dien dach, seyt die Heere Godt, daer salder veel steruen, in alle plaetsen sal tswijghen gheworpen worden.

4

Hoort dat ghi die de armen verdruct, ende doet die behoeftighe der eerden vergaen,

5

segghende. Wanneer sal den oochst voer by gaen, ⁺ende wy sullen onse coopgoeden vercoopen, ende den Sabboth, ende wy sullen die tarwe voort doen, op dat wy die mate verminderen, moghen ende de sikel vermeerderen, ende valsche waghen heymelijck voertstellen.

+ B

6

Op dat wy doer tsiluer moghen besitten die behoeftighe, ende die arme om scoenen, ende dat wy die crinsen van die tarwe vercoopen moghen?

7

Die Heere heeft ghesworen by die hoouerdie van Iacob. Ist dat ick verghete totten eynde allen hen wercken.

8

En sal die eerde hier ouer niet beroert werden, ende en sal alle haer bewoonder niet weenen? ⁺ende hy sal opcomen als eenen gheheelen vloet, ende hy sal neder vloeden als die riuiere van Egypten?

+ C

9

Ende tsal zijn op dien dach seyt die Heere, dat die sonne sal ondergaen inden middach, ende ick sal die eerde doen verduysteren in den dach des lichts.

10

Ende ick sal v feestdaghen verkeeren in weeninghe, ende alle uwe sancliedekens in kermen, ende ick sal op alle uwe rugghen sacken ouertrecken, ende op alle hoofden caluheyt, ende ick salse stellen als den rouwe vanden eenighen gheboren, ende sijn wterste als eenen bitteren dach.

11

⁺Siet die daghen comen seyt die Heere, ende ick sal den hongher op dlant seynden, niet den hongher des broots, noch den dorst des waters, maer om te hooren dat woert des Heeren.

+ D

12

Ende sij sullen beroert worden van die zee totter zee, ende van den noorden totten oosten, sullen sij rontsom gaen des Heeren woert soeckende, ende sij en sullense niet vinden.

13

In dien dach sullen die schoone maechden vergaen, ende die ionghelinghen van dorste.

14

Die by die misdaet van Samarien sweeren, ende segghen. V Godt leeft o Dan, ende den wech van Bersabee leeft, ende sij sullen vallen, ende voert aen niet meer opstaen.