Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .ix. Capittel.

1

⁺ICk heb den Heere sien staen, opden outaer, ende hy heeft gheseyt, Slaet die herre, ende laet de ouerste dorpels beroert werden, want die

+ A

[p. *699]

ghiericheyt is int hooft van hen allen, ende den wtersten van hen sal ick metten sweerde verslaen, hen en sal gheen vlieden wesen, sij sullen vlieden, ende daer en sal niemant van hen behouden worden die vlieden sal.

2

Ist dat sij nederdalen totter hellen, van daer salse mijn hant wtleyden, ende ist dat sij opclimmen totten hemel, van daer sal icse nederwaerts trecken.

3

Ende ist dat sij verborghen zijn opden tsop van Carmelus, van daer sal icse ondersoekende wech nemen, ende ist dat sij hen verberghen van mijn ooghen in die diepten der zee, daer sal ick den serpente ghebieden, ende het salse bijten.

4

⁺Ende ist dat sij in gheuanghenisse gaen voer hen vianden, daer sal ict den sweerde beuelen, ende dat salse dooden, ende ick sal mijn ooghen op hen stellen int quaet, ende niet int goet.

+ B

5

Ende die Heere die Godt der heyrscaren die deerde raect, en sij sal verdwijnen, ende alle die op haer woonen sullen trueren, ende het sal al opgaen als een riuier, ende het sal afvloeden als de vloet van Egypten.

6

Die inden hemel sijn opclimminghe timmert, ende sijn bondelken op deerde ghefundeert heeft, die de wateren der zee roept, ende stort die wt op dat aensicht der eerden. Die Heere is sijnen naem.

7

En sijdi ghy kinderen van Israel my niet als der Morianen kinderen, seyt die Heere? En heb ick Israel niet doen opclimmen wten lande van Egypten, ende die Palestijnen van Cappadocien, ende die Siriers van Syrenen?

8

⁺Siet die ooghen des Heeren Godts sijn op dat sondighende rijck, ende ick sal dat vernielen van daensicht der eerden. Maer nochtans en sal ick vernielende niet vernielen het huys van Iacob seyt die Heere,

+ C

9

Want siet ick salt beuelen, ende ick sal in alle die Heydenen te samen stooten het huys van Israel, alsmen in den teemst te samen hutselt, ende daer en sal niet een steenken op deerde vallen.

10

Doert sweert sullen steruen all die sondaers mijns volcs, die segghen. Het quaet en sal niet naken ende ten sal op ons niet comen.

11

In dien dach sal ick Dauids tabernakel verwecken, dat gheuallen is, ende ick sal wederom timmeren die scoeren zijnder mueren, en datter heel gheuallen was, dat sal ic wederom vermaken, ende ick sal hem wederom timmeren als in die oude daghen

12

dat sij moghen, besitten die bleuelinghen vanden Idumeen, ⁺ende alle die natien om dat mijnen naem ouer hen aengheroepen is, seyt die Heere doende dese dinghen.

+ D

13

Siet die daghen comen, seyt die Heere, ende die ploegher sal achterhalen den maeyere, ende den wijntredere den ghenen die tsaet saeyt. Ende die hemelen sullen soeticheyt druypen, ende alle hueuelen sullen ghebouwet worden.

14

Ende ick sal die gheuanghenisse mijns volcs Israels wederom keeren, ende sij sullen die verlaten steden optimmeren, ende sij sullen daer in woonen, ende wijngaerden planten, ende sij sullen haren wijn drincken, ende sij sullen houen maken, ende die vrucht van die sullen sij eten. Ende ic salse planten op hen lant, ende ic en salse niet meer wtroeyen van hen lant, het welck ick hen ghegheuen hebbe, seyt die Heere uwe Godt.

Hier voleyndt die Prophetie Amos.