Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .vij. Capittel.

1

⁺DEse dinghen heeft my die Heere Godt ghetoont, ende siet die maker der sprinchanen int beghinsel der spruyten van den spaden reghen, ende siet den spaden reghen, nae den sceerder vant cudde.

+ A

2

Ende tis ghesciet doen hy voleyndt hadde te eten het cruyt des lants, dat ick gheseyt hebbe. Heere Godt weest doch ghenadich, bid ick, wie sal Iacob verwecken want hy seer cleyn is?

3

Die Heere heeft daer op bermherticheyt ghehadt. Ten sal niet zijn, seyt die Heere,

4

Dese dinghen heeft my die Heere Godt ghetoont, ende siet die Heere Godt riep het ordeel totten viere, ende tverslinde die groote diepte, ende het heeft tsamen gheten een deel.

5

⁺Ende ick heb gheseyt. Heere Godt rust doch, dat bid ick, wie sal Iacob verwecken, want hy is cleyne?

+ B

6

Die heere heeft daer op bermhertich gheweest. Maer dit en sal oock niet wesen, seyt die Heere Godt.

7

Dese dinghen heeft my die Heere ghetoont, ende siet die Heere was staende op eenen besetten muer, ende in zijn hant was eens metsers trouweel.

8

Ende die Heere heeft tot my gheseyt, Wat siet ghy Amos? Ende ick heb gheseyt, eens metsers trouweel. Ende hi heeft gheseyt, Siet ick sal een trouweel stellen in midden van mijn volck Israel, Ick en salder niet meer toe doen om die ouer te leyden.

9

Ende sij sullen afworpen die hoochden des affgodts, ende die heylichmakinghen van Israel sullen verwoest worden, ⁺ende ick sal opstaen opt huys van Ieroboam metten sweerde.

+ C

10

Ende Amasias die Priester van Bethel heeft ghesonden aen Ieroboam den coninck van Israel segghende, Amos es wederspannich gheworden teghen v int midden des huys van Israel, die eerde en sal niet moghen verdraghen alle sijn woerden.

11

Want dit seyt Amos Ieroboam sal metten sweerde steruen, ende Israel sal gheuanghen verhuysen wt sijnen lande.

12

Ende Amasias heeft gheseyt tot Amos, Ghy die siet, gaet henen, vliedt int lant van Iuda, ende eet daer broot, ende daer suldi propheteren.

13

Ende ghi en sulter niet meer toe doen om in Bethel te propheteren. Want het is des conincs heylichmakinghe, ende het huys des rijcs.

14

⁺Ende Amos heeft gheantwoert, ende gheseyt tot Amasiam. Ick en ben gheen propheet, ende ick en ben gheen propheets sone, maer ick ben een vee herder, pluckende die wilde vijghen.

+ D

15

Ende die Heere heeft my ghenomen doen ick het cudde volchde, ende die Heere heeft tot my gheseyt. Gaet henen ende propheteert tot mijnen volcke Israel.

16

Ende nu hoort des Heeren woert. Ghy segt. Ghi en sult op Israel niet propheteren, ende ghy en sult niet druyppen opt affgodts huys.

17

Daerom dit seydt die Heere, V huysvrouwe sal in die stadt oncuysheyt bedrijuen, ende v sonen ende v dochteren sullen doert sweert vallen, ende v landt sal metten coordeken ghemeten worden, ende ghy sult int besmet lant steruen. Ende Israel sal gheuanghen wechgaen van sijn lant.