Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .vi. Capittel.

1

⁺VVee v die rijck sijt opden berch van Sion, ende betrouwen hebt in den berch van Samarien, ghy edele hoofden der volcken, houerdelijck gaende int huys van Israel.

+ A

2

Gaet doer in Calamne ende besiet, ende gaet van daer in Emath die groote, ende gaet neder in Geth der Palestijnen ende tot alle die beste rijcken van dese, oft hen pale breeder dan v pale.

3

Die affghesceyden sijt totten quaden dach, ende ghenaect den stoel der boosheyt,

4

die in yuooren bedden slaept, ende wellusticheyt bedrijft in v rustplaetsen, die dlam eet vanden cudde, ende die calueren wt het midden der runderen.

5

Die singt nae dat gheluyt des Psalterspeels, ⁺ghelijck Dauid hebben sij ghemeynt dat sij oock die instrumenten des sancs hadden.

+ B

6

Drinckende den wijn wt scalen, ende met die beste saluen ghesalft, ende sij en hadden gheen medelijden op die vernielinghe van Ioseph.

[p. *698]

7

Daerom sullen sij nu verhuysen in thooft der gheender die ouergheuoert worden sullen, ende tgheselscap der wellustigher sal wech ghenomen worden.

8

Die Heere Godt heeft ghesworen by sijn ziele, seyt die Heere Godt der heyrscaren. Ick versmade die houerdie van Iacob, ende ick hate sijn huysen, ende ick sal die stadt leueren met haren bewoonders.

9

⁺Ende ist datter ouerbleuen sullen zijn thien mannen in een huys, die sullen oock steruen.

+ C

10

Ende zijn naeste sal hem nemen, ende hy sal hem verbranden, dat hy die beenderen wten huyse draghe, ende hy sal hem segghen die int binnenste des huys is. Isser noch iemant by v?

11

Ende die sal antwoerden. Het is deynde. Ende hy sal hem segghen, Swijcht, ende en ghedenct den naem des Heeren niet.

12

Want siet die Heere heuet gheboden, ende hy sal het meeste huys slaen met veruallinghen, ⁺ende het minste huys met scoeren.

+ D

13

Moghen die peerden loopen op die harde steenrootsen oft machmen ackeren met buffels, want ghi hebt het ordeel in bitterheyt verkert, ende die vrucht der rechtuerdicheyt in Alsen?

14

Die v verblijt in niet, die segt. En hebben wy in onse stercheyt ons niet hornen aenghenomen?

15

Want siet ick sal op v verwecken ghy van Israel, seyt die Heere der heyrscaren een volck, ende sij sullen v vernielen van den inganck van Emath totter beken der woestijnen.