Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .v. Capittel.

1

⁺HOort dit woert dat ick heffe op v lieden wesende een ghescrey. Het huys van Israel is gheuallen, ende ten sal niet meer daer toe doen, om op te staen.

+ A

2

Die maghet van Israel is verworpen in haer lant, daer en is niemant diese wecke.

3

Want dit seyt die Heere Godt, Die stadt waer wt datter duysent ghinghen, daer sullender hondert achter ghelaten worden, ende daer der hondert wtghinghen, daer salder thien achterghelaten worden int huys van Israel.

4

Want dit seyt die Heere den huyse van Israel. ⁺Soect my ende ghy sult leuen.

+ B

5

Ende en wilt Bethel niet soecken, ende in Galgalam en wilt niet ingaen, ende tot in Bersabee en suldi niet doergaen. Want Galgala sal gheuanghen wech gheleydt werden, ende Bethel sal onnut wesen.

6

Soect den Heere ende leeft, dat bij auontueren het huys van Ioseph niet verbrant en worde als een vier, ende daer en sal niemant wesen die Bethel wtblussche,

7

die het ordeel verkeert in alsen, ende die rechtuerdicheyt in die eerde verlaet.

8

Den ghenen die arcturus sterren maect ende Orionen, ⁺ende die den morghenstont verkeert in duysternissen, ende den dach verandert in den nacht, die de wateren der zee roept, ende stort die wt op daensicht der eerden Heere is sijnen naem.

+ C

9

Die die verwoestinghe begrijmt op den stercken, ende die beroouinghe brengt opden machtighen.

10

Sij hebben ghehaet den ghenen die berispt in die poorte, ende die volmaectelijck sprack hebben sij vereyst.

11

Daer om want ghy den armen beroofdet, ⁺ende den wtghecoren roof van hem naemt, so suldi huysen met viercantighe steenen timmeren, ende ghy en sult daer niet in woonen, ghy sult die alderliefste wijngaerden planten, ende ghy en sult den wijn van die niet drincken.

+ D

12

Want ick heb uwe veele groote misdaden bekent, ende v stercke sonden, ghy vianden vanden rechtuerdighen, ghiften nemende ende die arme verdruckende in die poorte.

13

Daer om sal die wijse in dien tijt swijghen, want den tijt is quaet.

14

Soecket goet, ende niet het quaet, dat ghy leuet, ende die Heere die Godt der heyrscaren sal met v lieden sijn, ⁺alsoo ghy lieden gheseyt hebt,

+ E

15

Haet dat quaet, ende bemint het goet, ende stelt in die poorte het ordeel, oft by auontueren die Heere der heyrscaren ontfermde den bleuelinghen van Ioseph.

16

Daerom dit seyt die Heere der heyrscaren, die heerscapper. In alle straten sal ghescrey wesen, ende in alle die plaetsen die buyten zijn salmen segghen, wee, wwe, ende sij sullen den ackerman totter weeninghen roepen, ende tot beclaghinghe die ghene die beclaghen connen.

17

Ende in alle wijngaerden sal gheclach wesen, want ick sal int midden van v doergaen seyt die Heere.

18

⁺Wee den ghenen die den dach des Heeren begheren. Waer toe begheerdi dien voer v lieden? Desen dach des Heeren sal duysternisse wesen, ende gheen licht.

+ F

19

Als oft een man vloodt van eens leuws aensicht, ende dat hem eenen beyr te ghemoete quame, ende dat hy in huys ghinghe ende ruste met sijn hant opden want, ende dat hem een slanghe bete.

20

En is des Heeren dach niet duysternisse, ende gheen licht, ende donckerheyt is daer in, ende gheen scijnsel?

21

Ick heb ghehaedt ende verworpen uwe feestdaghen, ende ick en sal den rueck van uwe vergaderinghen niet ontfanghen.

22

⁺Ende ist dat ghy my heelbrantofferanden offert, ende v ghiften ick en salse niet ontfanghen, ende die beloften van uwen vetten vee en sal ick niet aentsien.

+ G

23

Neemt van my het gherucht van uwen liedekens, ende die sanghen van uwer lieren en sal ick niet hooren.

24

Ende het ordeel sal als water ontdect werden, ende die rechtuerdicheyt als een stercke beke.

25

Hebdi my slachofferanden ende sacrificie gheoffert in die woestijne veertich iaren, ghy huys van Israel?

26

Ende ghy hebt ghedraghen het tabernakel uwen Moloch, ende het beelt van uwen afgoden, die sterre ws Godts, die ghy v seluen ghemaect hebbet.

27

Ende ic sal v doen verhuysen ouer Damascum, seyt die Heere die Godt der heyrscaren is sijnen naem.