Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .iiij. Capittel.

1

⁺HOort dit woert ghy vette coeyen, die opden berch van Samarien sijt, die valsch onrecht doet den behoeftighen, ende die arme heel in stucken breket, die uwen Heeren segt, Haelt, ende wy sullen drincken.

+ A

2

Die Heere Godt heeft ghesworen by sijnen heylighe, want siet die daghen sullen comen op v lieden, ende sij sullen v opheffen in spiessen, ende v bleuelinghen in siedende potten.

3

Ende ghy sult doer die spleten wtgaen deen teghen dandere, ende ghy sult gheworpen werden in Armon seyt die Heere,

4

Coemt tot Bethel, ende doet ongoddelijck, tot Galgalam ende vermenichfuldicht die ouertredinghe, ende offert des morghens vroech v slachofferanden, drij daghen lanck v thienden.

5

⁺Ende doet sacrificie van den gheheefden loff, ende roept die vrijwillinghe offeranden, ende vercondighet, want alsoo hebdijt ghewilt ghi kinderen van Israel, seyt die Heere Godt.

+ B

6

Waerom heb ick v lieden ooc

[p. *697]

ghegheuen verboomtheyt der tanden, in alle uwe steden, ende ghebreck der brooden in alle uwe plaetsen, ende ghy en sijt niet wederghekeert tot my, seyt die Heere,

7

Ick heb oock van v lieden den reghen verboden, doent noch drij maenden waren totten ooste, ende ick hebt doen reghenen op die een stadt, ende op die ander stadt en heb ict niet doen reghenen, het een deel is bereghent gheweest, ende het deel daer op ict niet en heb doen reghenen is verdroocht.

8

Ende daer sijn twee ende drij steden ghecomen tot een stadt dat sij water souden drincken, ende sij en sijn niet versaet gheweest, ⁺ende ghi en sijt tot my niet wederghekeert, seyt die Heere,

+ C

9

Ic heb v lieden gheslaghen metten berrenden wint, ende met die versengtheyt, die menichte van uwen houen, ende van uwen wijngaerden, uwe olijfgaerden, ende uwe vijchgaerden heeft die rupsene gheten, ende ghy en sijt niet wederghekeert tot my seyt die Heere.

10

Ick heb op v die doot ghesonden inden wech van Egypten, ick heb v ionghelinghen metten sweerde gheslaghen, tot die gheuanghenisse van uwen peerden, ende ick heb den stanck van uwen heyrlegheren doen opgaen tot in uwe nuesgaten, ende ghy en sijt tot my niet wederghekeert, ⁺seyt die Heere,

+ D

11

Ick heb v lieden omgheworpen, ghelijck Godt Sodomam ende Gomorrham omgheworpen heeft, ende ghi sijt gheworden als eenen brant wtghetrocken wten viere, ende ghy en sijt niet wederghekeert tot my, seyt die Heere.

12

Daer om sal ick v dese dinghen doen Israel, ende nae dat ic v dese dinghen sal ghedaen hebben. soo bereydt v o Israel uwen Gode te ghemoete.

13

Want siet die ghene die de berghen maect, ende den wint scept, ende den mensche sijn wtsprake vercondicht, die den vroeghen neuel maect, ende gaet op die hoochden der eerden. Die Heere der heyrscaren is sijnen naem.