Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .iij. Capittel.

1

⁺HOort het woert dat ick ghesproken hebbe tot v lieden, ghy kinderen van Israel, op alle dat maechscap dat ic gheleyt hebbe wten lande van Egypten segghende,

+ A

2

Alleenlijck heb ick v lieden ghekent wt alle die gheslachten, der eerden. Daerom sal ick op v lieden versoecken alle uwe boosheden.

3

Sullender twee tsamen wandelen, ten sij dat sij eendrachtich zijn?

4

Sal den leuw briesschen int wout, ten sij dat hy eenen roof heeft? sal des leuws welpen een stemme wt sijn hol gheuen, ten sij dat hy wat ghegrepen heeft?

5

Sal den voghel int net op eerden vallen, sonder voghelaer? ⁺sal den strick vander eerden ghenomen werden eer hy iet gheuanghen heeft?

+ B

6

Sal het trompet in die stadt gheclanck maken, ende dat het volck hem niet en sal verscricken? sal der eenich quaet sijn inder stadt, dat die Heere niet ghedaen en sal hebben?

7

Want die Heere Godt en sal gheen woert doen, hy en salt tot sijnen dienaers den propheten sijn secreet openbaren.

8

Die leuw sal briesschen, wie en sal niet vreesen? Die Heere Godt heeft ghesproken, wie en sal niet propheteren?

9

Maect dat ghehoort worde in die huysen van Azoten, ende in die huysen des lants van Egypten, ⁺ende segt. Wert vergadert op die berghen van Samarien, ende siet veel rasernien int midden van hair ende valsche besculdinghe lijdende in haer binnenste.

+ C

10

Ende sij en hebben niet connen ghedoen dat recht is, seyt die Heere, vergaderende als scatten die boosheyt, ende roouen in hen huysen.

11

Daer om dit seyt die Heere Godt, Het lant sal ghequelt ende omringht worden, ende v stercheyt sal van v aff ghetrocken werden, ende v huysen sullen berooft werden.

12

Dit seyt die Heere, Ghelijck oft die herder wt des leuws muyl wt trocke twee beenen, ⁺oft het wterste der ooren, alsoo sullen die kinderen van Israel verlost worden die in Samarien woonen, in die plaghe des beddekens, ende int bedde van Damascus.

+ D

13

Hoort ende betuyghet in Iacobs huys seyt die Heere Godt der heyrscaren,

14

want inden dach als ick sal beghinnen te besoecken die ouertredinghen van Israel, soe sal ick op hem versoecken, ende ouer die outaren van Bethel, ende die hoornen des outaers sullen aff ghehouwen worden, ende sij sullen op deerde vallen.

15

Ende ick sal het winter huys slaen metten somer huyse, ende die yuooren huysen sullen vergaen, ende veel huysen sullen ghebroken werden seyt die Heere.