Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .ij. Capittel.

1

⁺DIt seyt die Heere, Op die drij groote misdaden van Moab, ende op die viere en sal ick hem niet bekeeren, om dat hy verbrant heeft die ghebeenten des conincs van Idumeen totten asschen toe,

+ A

2

ende ick sal een vier senden in Moab, ende tsal verslinden die huysen van Carioth, ende Moab sal int gheluyt steruen, int gheclanck der trompetten,

3

ende ick sal den richter vernielen wt het midden van hem, ende alle zijn princen sal ick met hem dooden, seyt die Heere.

4

Dit seyt die Heere op die drij groote misdaden van Iuda, ende op die viere en sal ick hem niet bekeeren, om dat hy des Heeren wet verworpen heeft, ende zijn gheboden niet bewaert en heeft, want hen affgoden hebben hen bedroghen, ⁺waer nae dat hen vaderen wech ghegaen waren.

+ B

5

Ende ick sal een vier in Iudam senden, ende tsal verslinden die huysen van Ierusalem.

6

Dit seyt die Heere, Op die drij groote misdaden van Israel, ende op die viere, en sal ick hem niet bekeeren, om dat hy den rechtuerdighen om ghelt vercocht heeft, ende den armen om scoenen.

7

Die der armer hoofden opt stoff der aerden vernielen, ende den wech der ootmoedigher verkeeren, ende die sone ende zijn vader ghinghen tot een ionghe dochter, dat sij mijnen heylighen naem ontsuyueren souden,

8

ende op die verpande cleederen hebben sij gheseten by alle outaeren, ⁺ende den wijn der verdoemder droncken sij in thuys Gods.

+ C

9

Ende ick heb den Amorrheum wt ghedreuen van hen aensicht. Wiens lengde was als die lengde der cederboomen, ende hy was sterck als een eycke, ende ic heb sijn vrucht bouen vernielt, ende zijn wortelen onder.

10

Ick bent die v heb doen opclimmen wten lande van Egypten, ende heb v gheleyt in die woestijne veertich iaren, dat ghy besitten soudt het lant der Amorrheen.

11

Ende ick heb van uwen kinderen sommighe verwect tot propheten, ende van uwen ionghelinghen tot Nazareen en ist alsoo niet ghy kinderen van Israel, seyt die Heere?

12

Ende ghy sconct den Nazareen wijn, ende den Propheten hebdi gheboden, segghende, En propheteert niet.

13

⁺Siet ick sal kerren onder v lieden ghelijck eenen waghen met hoy gheladen kerret.

+ D

14

Ende die vlucht sal vergaen van den rasschen, ende die stercke en sal sijn cracht niet behouden, ende die vrome en sal sijn ziele niet verlossen,

15

ende die den boghe houdt die en sal niet staen, ende die rassch in zijn voeten is en sal niet behouden worden, ende die peerde bescrijder ende sal sijn ziele niet verlossen,

16

ende die vrome van herten sal onder die stercke naect vlieden, in dien dach, seyt die Heere.