Den gheheelen Bybel, Inhoudende het oude ende nieuwe Testament (Leuvense bijbel 1548)

Dat ierste Capittel.

1

⁺DIe woorden van Amos die gheweest is onder die herderen van Thecue, die hy ghesien heeft ouer Israel in die daghen Ozie des conincks van Iuda ende in die daghen van Ieroboam Ioas sone, des conincs van Israel, twee iaren voor die aertbeuinghe.

+ A

2

Ende hy heeft gheseydt. Die Heere sal van Sion briesschen, ende van Iherusalem sal hy zijn stemme gheuen, ende die schoone plaetse der herderen hebben ghetruert, ende den tsop van Carmelus is wt ghedroocht.

3

Dit seyt die Heere. ⁺Op die drije groote misdaden van Damascus ende op die viere en sal ic hem niet bekeeren, om dat si met yseren dorschwagenen Galaad ghedorsschen hebben.

+ B

4

Ende ick sal tvier senden in Azaels huys, ende het sal verslinden het huys van Benadab.

5

Ende ick sal die roede van Damascus breken, ende ick sal den bewoonder vernielen van des affgodts velt, ende den ghenen die den scepter houdt van den huyse der wellusticheden, ende tvolck van Sirien sal ouergheuoert werden in Sirenen, seyt die Heere

6

Dit seyt die Heere. Op die drij groote misdaden van Gaza ende op die viere en sal icse niet bekeeren, om dat sij die volkomen gheuanghenisse ouergheuoert hebben, dat si die besluyten souden in Idumeen.

7

Ende ic salt vier seynden inden muer van Gaza, ⁺ende tsal zijn huysen verslinden.

+ C

8

Ende ick sal den bewoonder vernielen van Azoten, ende den ghenen die den scepter houdt van Ascalon, ende ic sal mijn hant omkeeren op Accaron, ende die ouerghebleuene der Palestijnen sullen vergaen, seyt die Heere Godt.

9

Dit seyt die Heere. Op die drij groote misdaden van Tyrus, ende op die viere en sal ick hem niet bekeeren, om dat si die volcomen gheuanghenisse besloten hebben in Idumeen, ende niet ghedachtich en zijn gheweest des verbonts der broederen.

10

Ende ick sal tvier senden inden muer van Tyrus, ende tsal sijn huysen verslinden.

11

Dit seyt die Heere op die drij groote misdaden van Edom ende op die viere en sal ick hem niet bekeeren, ⁺om dat hy metten sweerde sijnen broeder veruolcht heeft, ende sijn bermherticheyt ghebroken, ende heeft daer bouen sijn rasende gramscap ghehouden, ende heeft sijn ver-

+ D

[p. *696]

bolghentheyt ghehouden totten eynde toe.

12

Ick sal een vier seynden in Theman, ende het sal verslinden die huysen van Bosre.

13

Dit seyt die Heere, Op die drij groote misdaden der kinderen van Ammon, ende op die viere en sal ick hem niet bekeeren, om dat hy open ghesneden heeft die bevruchte vrouwen van Galaad om zijn pale te verbreyden.

14

Ende ick sal een vier ontsteken inden muer van Rabba, ende tsal sijn huysen verbranden met een ghehuyl, in den dach der orloghen, ende in den storm inden dach der beroeringhen.

15

Ende Melchom sal in die gheuanghenisse gaen, hy ende sijn princen te samen, seyt die Heere.