Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .ij. Capittel.

1

⁺BLaest metten trompette in Sion, huylt op mijnen heylighen berch, laet alle die bewoonders des lants verbaest worden, want den dach des Heeren coemt,

+ A

2

want den dach der duysternissen ende des neuels is nae by, den dach der wolcken, ende des stormende wints. Als den morghenstont wtghespraeyt op die berghen, isser een volc dat vele ende sterck is, sijns ghelijc en heeft niet gheweest vanden beghinne, ende na hem en sal gheen wesen tot die iaren der generatien ende generatien.

3

Voor sijn aensicht is een verslindende vier, ende nae hem een verberrende vlamme, als eenen hof der weelden is die eerde voor hem, ende nae hem een woestijne der verlatenissen, wanr daer en is niemant die hem ontuliede.

4

Als een aensien der peerden alsoo is hen aensien, ende als peerde volck soo sullen si loopen.

5

⁺Als tgheluyt der wagenen sullen si opspringhen op die hoofden der berghen als tgheluyt van een vlamme viers die stoppele verslindende, als een sterck volc bereyt ten strijde.

+ B

6

Van sijn aensicht sullen die volcken ghepijnicht werden, alle die aensichten sullen verkeert worden als eenen swarten pot.

7

Sij sullen loopen als stercke, als orloochsche mannen sullen si den muer opclimmen, die mannen sullen in hen weghen gaen, ende si en sullen niet afwijcken van haren paden.

8

Een ieghelijck en sal sijnen broeder niet benauwen, sij sullen elck in haeren padt wandelen, maer sij sullen ooc door die vinsteren vallen, ende si en sullen niet affbreken.

9

Sij sullen in die stadt gaen, opden muer sullen si loopen, si sullen op die huysen climmen, door die vensteren sullen si incomen als een dief.

10

Van sijn aensicht heeft die eerde ghebeeft, die hemelen zijn beroert, die sonne ende die mane zijn verduystert gheweest, ende die sterren hebben hen scijnsel wederom ghetrocken.

11

⁺Ende die Heere heeft sijn stemme ghegeuen voor daensicht van zijn heyr, want sijn heyrlegheren zijn wter maten seer vele, want sij sijn sterck ende doende zijn woort, want des Heeren dach is groot, ende seer veruaerlijck, ende wie sal hem verdraghen?

+ C

12

Daerom nv seyt die Heere, bekeert v tot mi wt alle v herte, in vasten, ende in weenen, ende in claghen.

13

Ende snijdt v herten ende niet v cleederen, ende bekeert v totten Heere uwen Godt, want hy is goedertieren ende bermhertich, verduldich ende van veel bermherticheyt, ende milt int vergheuen ouer die quaetheyt.

14

Wie weet oft hy bekeert werde, ende vergaue ende liete nae hem die benedictie, sacrificie, ende vochtighen offer voor den Heere onsen God?

15

Blaest met den trompet in Sion. Heylicht die vasten, roept die menichte.

16

Vergadert het volc, heylicht die vergaderinghe, ⁺doet te hoope comen die ouders, versaemt die cleyn kinderen, ende die de borsten suyghen, laet die brudegom wt zijn slaepcamer gaen, ende die bruyt wt haer bruloft camer.

+ D

17

Tusschen het portael ende den outaer sullen die priesters des Heeren dienaers weenen ende segghen. Spaert Heere, spaert v volc, ende en gheeft v erffenisse niet tot versmaetheyt, dat die Heydenen ouer hen heerscappie souden hebben, waerom segghen si onder die volcken. Waer is hen Godt?

18

Die Heere heeft zijn lant seer sterckelijc lief ghehadt, ende hy heeft zijn volck ghespaert.

19

Ende die Heere heeft gheantwoort ende gheseyt sijnen volcke. Siet ick sal v lieden seynden tarwe, ende wijn, ende olie, ende ghy sult daer door versaedt werden, ende ick en sal v lieden niet meer gheuen tot versmaetheyt onder die Heydenen.

20

⁺Ende den ghenen die vanden noorden is, sal ick verre maken van v lieden, ende ick sal hem wtdrijuen tot een onwandelbaer ende verwoest lant, Sijn aensichte sal wesen teghen die oostzee ende zijn wterste tot die wterste zee, ende sijnen stanck sal opgaen, ende sijnen etter sal opclimmen, want hy heeft hoouerdelijck ghedaen,

+ E

21

En wilt niet vreesen o eerde, verhuecht v ende weest blijde, want die Heere heuet groot gheacht dat hijt doen soude.

22

En wilt niet vreesen ghy dieren des lantscaps, want die schoon plaetsen der woestijnen hebben ghegroeyt, want die boomen hebben hen vrucht voortghebracht, den vijgheboom, ende den wijngaert hebben hen cracht ghegheuen.

23

Ende ghy kinderen van Sion verhuecht v, ende verblijt v inden Heere uwen Godt, want hy heeft v lieden ghegheuen den leeraer der rechtuerdicheyt, ⁺ende hy sal tot v doen nederdalen den vroeghen ende spaden reghen, als int beghinsel.

+ F

24

Ende die dorschuloeren sullen met tarwe veruult worden, ende die wijnperssen sullen oueruloeden van wijn ende olie,

25

ende ick sal v wederom gheuen die iaren die den sprinchaen gheten heeft, ende den cruytworm ende die versengtheyt, ende die rupsene, mijn groote macht die ick onder v lieden ghesonden hebbe.

26

Ende ghy sult etende eten, ende versaedt werden, ende ghi sult louen den naem des Heeren ws Gods, die wonderlijcke dinghen met v lieden ghedaen heeft, ende mijn volc en sal inder eewicheyt niet bescaemt werden.

27

Ende ghy sult weten dat ick int midden van Israel ben, ende ick ben die Heere v God, ende daer en is gheen meer, ende mijn volck en sal niet bescaemt werden inder eewicheyt.

28

Ende tsal zijn nae desen dat ick mijnen gheest wtstorten sal op alle vleesche, ⁺ende v sonen sullen propheteren ende v dochteren, v ouders sullen droomen droomen ende v ionghelinghen sullen visioenen sien,

+ G

29

Maer oock op mijn knechten ende dienstvrouwen sal ick in die daghen mijnen ghhest wtstorten.

30

Ende ick sal wonderlijcke teekenen gheuen inden hemel ende in die eerde, bloet, ende vier, ende domp des roocs.

31

Die sonne sal verkeert werden in duysternisse, ende die mane in bloet eer den grooten ende veruaerlijcken dach des Heeren comen sal.

32

Ende tsal zijn dat alle die mijnen naem aenroept sal salich zijn, want opden berch van Sion ende in Ierusalem sal verlossinge sijn, alsoo die Heere gheseyt heeft, ende in die ouerghebleuene die de Heere sal gheroepen hebben.