Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .iij. Capittel.

1

⁺WAnt siet in die daghen, ende in dien tijt als ick ghekeert sal hebben die gheuangenisse van Iuda ende Ierusalem.

+ A

2

Dan sal ick alle die Heydenen vergaderen, ende ick salse leyden int dal

[p. *695]

van Iosaphat, ende ick sal daer met henlieden disputeren van mijn volck ende mijn erffenisse Israel, die sij verstroeyt hebben onder die Heydenen, ende hebben mijn lant ghedeylt.

3

Ende op mijn volck hebben si dlot gheworpen, ende si hebben het knechtken int bordeel ghestelt, ende het meysken hebben sij vercocht om wijn op dat si drincken souden.

4

Maer wat is my ende v ghi Tyrus ende Sidon, ende alle ghy pale der Palestijnen? Suldi my die wrake verghelden? ⁺ende ist dat ghy v wreect teghen my soo sal ick ter stont die vergheldinghe rasschelijck betalen op v lieder hooft,

+ B

5

want ghy hebt mijn siluer ende gout ghenomen ende mijn begheerlijcke ende alderschoonste dinghen hebdi ghedraghen in v tempelen der affgoden.

6

Ende die kinderen van Iuda ende Ierusalem hebdi vercocht den kinderen der griecken, om dat ghy die verre maken soudt van uwen palen.

7

Siet ick salse verwecken vander plaetsen waer in ghi die vercocht hebt, ende ick sal v vergheldinghe wederom keeren teghen v hooft.

8

Ende ick sal v sonen ende v dochteren vercoopen in die handen der kinderen van Iuda ende si sullen die vercoopen den Sabeen den verre gheleghen volcke, want die Heere heuet ghesproken.

9

Roept dat onder die Heydenen, heylicht die orloghe, verwect die stercke, laetse aencomen, laet alle die orloochsche mannen opcomen,

10

vermaect v ploechcouteren tot sweerden, ⁺ende v spaden tot lancien, die crancke segghe. Ick ben sterc.

+ C

11

Berst wt, ende coemt alle ghi Heydenen van rontsomme ende wert vergadert, daer sal die Heere v stercke doen steruen.

12

Laet die Heydenen tsamen opstaen ende opclimmen int dal van Iosaphat want daer sal ick sitten om alle die Heydenen te ordeelen int ronde.

13

Slaet die seysenen in, want den oochst is rijp gheworden, coemt ende daelt neder, want die persse is vol, die perssen sijn oueruloedich, want hen quaetheyt is vermenichfuldicht.

14

Volcken volcken int dal der ontweesnijdinghe, want des Heeren dach is by int dal der ontweesnijdinghe.

15

Die sonne ende die mane zijn verduystert, ende die sterren hebben hen scijnsel wederom ghetrocken.

16

Ende die Heere sal van Sion briesschen, ende van Ierusalem sal hi sijn stemme gheuen, ende die hemelen ende deerde sullen beroert werden, ⁺ende die Heere sal sijns volcs hope zijn, ende die stercheyt der kinderen van Israel.

+ D

17

Ende ghy sult weten dat ick die Heere v lieder Godt ben woonende in Sion op mijnen heylighen berch, ende Ierusalem sal heylich wesen, ende die vreemde en sullen door haer niet meer gaen.

18

Ende tsal wesen in dien dach dat die berghen sullen soeticheyt druypen, ende die hueuelen sullen van melck vloeden, ende ouer alle die riuieren van Iuda sullen wateren ghaen, ende een fonteyne sal wt des Heeren huys gaen, ende die sal veruersschen die beke der dornen.

19

Egipten sal tot een verwoestinghe wesen, ende Idumeen tot een woestijne der verderffenisse, om dat sij booslijc ghedaen hebben teghen die kinderen van Iuda, ende hebben het onnoosel bloet wtghestort in hen landt.

20

Ende Iudeen sal inder eewicheyt bewoont worden, ende Ierusalem tot gheslachte ende gheslachte.

21

Ende ic sal hen bloet suyueren, dat ic niet ghesuyuert en hadde, ende die Heere sal woonen in Sion.

Hier voleyndt die prophete Ioel.