Den gheheelen Bybel, Inhoudende het oude ende nieuwe Testament (Leuvense bijbel 1548)

Dat ierste Capittel.

1

⁺HEt woort des Heeren datter ghesciet is tot Ioel Phatuels sone,

+ A

2

Hoort dit ghi ouders ende vatet metten ooren alle ghi bewoonders der eerden, oft dit ghesciet is in uwen daghen, oft in uwer vaderen daghen?

3

Vertelt daer aff uwen kinderen ende uwe kinderen haren kinderen, ende hen kinderen den anderen geslachte,

4

het ouerblijfsel vander rupsenen heeft den sprinchaen gheten ende het ouerblijfsel vanden sprinchaen heeft den cruytworm gheten, ende het ouerblijfsel vanden cruytworm, heeft die versengtheyt gheten.

5

Ontsprinct ghy dronckene ende weent, ende huylt alle die wijn drinct in soeticheyt, want hi is vergaen van uwen monde,

6

want daer is een volc gheclommen op mijn lant, sterc ende ontellijck, sijn tanden zijn als der leeuwen tanden, ende sijn baectanden sijn als van des leeuwen welpens,

7

⁺hy heeft mijnen wijngaert tot een woestijne ghestelt, ende mijnen vijgheboom heeft hy die scorsen affghescelt, hy heeft dien blootende berooft ende wech gheworpen sijn tacken zijn wit gheworden.

+ B

8

Maect een ghescrey als een maghet omgort sijnde met eenen sacke, ouer den man van haerder iongher iuecht.

9

Het sacrificie ende den drancoffer is vergaen van des Heeren huys, Die priesters des Heeren dienaers hebben gheweent.

10

Het lantscap is berooft, die eerde heeft gheweent, want die tarwe is verdoruen, den wijn is bescaemt, die olie is cranck gheworden.

11

Die ackerluyden zijn bescaemt, die wijnghaerders hebben ghehuylt ouer die tarwe, ende gherste, want den oochst des veldts is vergaen.

12

Den wijngaert is bescaemt, ende den vijgheboom is wtghequolen, den granaet appelboom, ende den dadelboom, ende den appelboom, ⁺ende alle die boomen des velts sijn verdroocht, want die blijscap is bescaemt van die kinderen der menschen.

+ C

13

Omgort v ende weent ghy priesters, huylt ghy dienaers des outaers, gaet binnen, ligt op eenen sack mijns Gods dienaers, want het sacrificie ende den drancoffer is vergaen van ws Gods huys.

14

Heylicht een vasten, roept die vergaderinghe, vergadert die ouders, alle die bewoonders des lants in ws Gods huys ende roept totten Heere.

15

Ay ay ay voor dien dach, want des Heeren

[p. *694]

dach is nae by, ende hi sal als een verwoestinge vanden machtigen comen.

16

En sijn die spijsen niet vergaen voor uwe ooghen van ons Gods huys, die blijscap ende dat verhueghen?

17

Die beesten sijn verrot in hen mest die scueren zijn afghebroken, ⁺die coren solders sijn verdoruen, want die tarwe is bescaemt,

+ D

18

waerom heeft het vee versucht, waerom hebben die cudden der runderen gheloeyt? om dat si gheen weyde en hebben, ende die cudden des cleynen vees sijn verloren ghegaen.

19

Tot v Heere sal ick roepen, want het vier heeft die schoonheden der woestijnen gheten, ende die vlamme heeft alle die boomen des lantscaps ontsteken.

20

Maer ooc soo hebben die beesten des velts als een dorre eerde dorstende nae den reghen opwaerts ghesien tot v, want die fonteynen der wateren sijn verdroocht, ende het vier heeft die schoonheden der woestijnen verslonden.