Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xiij. Capittel.

1

⁺DOen Ephraim sprack, soo heeft eenen grouwel Israel ouervallen, ende hy heeft misdaen in Baal, ende hy is ghestoruen.

+ A

2

Ende nv hebben sij daer toe ghedaen om te sondighen, ende sij hebben voor hen ghemaect een ghegoten beelt van haren filuer, als die ghelijckenisse der afgoden het is gheheel der constenaren werc, Tot desen seghen sij. Ghi menschen die de calueren aenbidt doet slachofferande,

3

Daerom sullen sij sijn als een morghenstonts wolcke, ende als den morghenstonts dauwe voorby gaende, ⁺alst ghestubbe metten stormenden wint wech ghenomen wten dorschuloer, ende als den rooc des scoorsteens,

+ B

4

Maer ick ben die Heere uwe Godt wten lande van Egipten, ende ghy en sult gheenen Godt behaluen my weten, ende daer en is gheen verlosser behaluen my.

5

Ick heb v ghekent in die woestijne int landt der wildernissen,

6

By hen weyden sijn sij veruult, ende versaedt gheweest, sij hebben hen herte opghehauen, ende sij hebben mijns vergheten.

7

Ende ic sal henlieden wesen als een leeuwinne, ⁺als eenen lupaert inden wech der Assyrianen.

+ C

8

Ick sal hen te ghemoete comen ghelijc een beyrinne als haren ionghen gherooft zijn, ende ick sal verschoeren het binnenste van hen leuere, ende ick salse daer vernielen als eenen leeuw, die beeste des velts salse van een scoeren.

9

Het is v verderffenisse o Israel, alleenlijc is in my v helpe,

10

Waer is v coninc? laet hem nv aldermeest v verlossen in alle uwe steden ende uwe rechters van die welcke ghy gheseydt hebt.

[p. *693]

Gheeft my coninghen ende princen.

11

Ick sal v eenen coninck gheuen in mijn rasende gramscap, ende ick sal hem wech nemen in mijn verbolghentheyt.

12

Die boosheyt van Ephraim is te samen ghebonden, sijn sonde is verborghen.

13

⁺Die pijnen van eender barender vrouwen sullen hem comen, hy is een sone niet wijs, want hy en sal nv niet staen int vernielen der kinderen.

+ D

14

Van die hant der doot sal icse behouden, van der doot sal icse verlossen, o doot ic sal uwe doot wesen. Ick sal uwen bete wesen o helle, die vertroostinghe is verborghen van mijnen ooghen,

15

Want hi sal tusschen die broeders deylen, ende die Heere sal eenen berrenden wint aenbrenghen van die woestijne opgaende, ende hy sal haer aderen verdrooghen, ende haer fonteyne verderuen, ende hy sal roouen den scadt van alle begheerlijcke vaten.