Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xij. Capittel.

1

⁺EPhraim voedt den wint, ende volcht die hitte, alle den dach vermenichfuldicht hy logenen ende verwoestinghe, ende hy heeft een verbont metten Assyriers aenghegaen, ende hi droech olie in Egipten.

+ A

2

Aldus is des Heeren ordeel met Iuda, ende die besoeckinghe op Iacob, na zijn weghen ende nae zijn wonden sal hy hem verghelden,

3

Inden buyck heeft hy sijnen broeder vertreden, ⁺ende in sijn sterckheyt is hy voorspoedich gheweest metten enghele.

+ B

4

Ende is machtigher gheweest dan die enghel, ende is versterct gheweest, hy heeft gheweent ende hem ghebeden, in Bethel heeft hy hem gheuonden, ende aldaer heeft hy met ons ghesproken.

5

Ende die Heere Godt der heyrscharen, die Heere is zijn ghedenckenisse.

6

Ende ghy sult tot uwen Godt omghekeert worden, bewaert die bermherticheyt ende het ordeel, ende hoept in uwen Godt altijt

7

Chanaan in zijn hant is een bedrieghelijcke waghe, ⁺hy heeft die onrechte besculdinghe bemint.

+ C

8

Ende Ephraim heeft gheseyt. Maer nochtans ben ick rijck gheworden, ick heb voor mij eenen affgodt gheuonden, alle mijn arbeyden en sullen voor my niet vinden die boosheyt die ick ghesondicht hebbe.

9

Ende ick ben die Heere v Godt vanden lande van Egipten, ick sal v noch doen sitten in tabernakelen als in die daghen des feestdaechs.

10

Ende ick heb ghesproken tot die propheten, ende ick heb die visioenen vermenichfuldicht, ende in der propheten hant ben ick verghelijct.

11

⁺Is in Galaad een affgodt, soo waren sij dan te vergheefs in Galgal den ossen offerende, want hen outaere waren als hoopen op die voren des ackers.

+ D

12

Iacob is gheuloden int lantscap van Sirien, ende Israel heeft ghedient om een huysvrouwe, ende om die huysvrouwe heeft hy ghedient,

13

Maer door eenen prophete heeft die Heere Israhel wt Egipten gheleydt, ende door eenen propheet is hy behouden gheweest,

14

Ephraim heeft my tot gramscap verwect, in sijn bitterheden, ende sijn bloet sal op hem comen, ende sijn verwijt sal hem zijn Heere verghelden.