Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xi. Capittel.

1

⁺GHelijck den morghenstont voorby gaet, alsoo is die coninck van Israhel voorby ghegaen, want Israel is een kint, ende ick heb hem lief ghehadt. Ende wt Egipten heb ick mijnen sone gheroepen.

+ A

2

Sij hebbense gheroepen, alsoo zijn sij wechghegaen van hen aensicht, Sij offerden Baalim, ende der afgoden beelden deden sij sacrificie.

3

Ende ick was als Ephraims voesterheere, ick droechse in mijnen armen, ende sij en wisten niet dat icse ghenas,

4

Met Adams zeelkens sal icse trecken, in die banden der liefden, ⁺ende ick sal henlieden wesen als het iock verheffende op hen wanghen, ende ick heb tot hem affgheweken op dat hy eten soude.

+ B

5

Hy en sal niet wederkeeren in dlant van Egipten, ende Assur selue sal sijn coninck sijn, want sij en hebben niet willen bekeert worden.

6

Het sweert heeft begonst in sijn steden, ende tsal sijn wtuercorene verteren, ende tsal hen hoofden eten.

7

Ende mijn volc sal twijfelachtich hanghen nae mijn wedercoemste, ende hen sal te samen een iock opgheleydt werden dat niet en sal affghenomen worden.

8

⁺Hoe sal ic v ouer gheuen Ephraim? hoe sal ic v bescermen Israel? Hoe sal ick v gheuen als Adama, sal ick v stellen als Seboim? Mijn herte is in my ommeghekeert, mijnen rouwe is te samen beroert.

+ C

9

Ick en sal die rasende gramscap mijns torns niet doen, ick en sal niet omghekeert worden om Ephraim te vernielen, want ick ben Godt ende gheen mensch, int midden van v heylich, ende ick en sal in die stadt niet ghaen.

10

Nae den Heere sullen sij wandelen, als eenen leeuw sal hi briesschen, want hy sal briesschen, ⁺ende die kinderen der zee sullen vreesen,

+ D

11

ende sij sullen wech vlieghen als eenen voghel wt Egipten, ende als een duyue wt den lande van Assirien, ende ic salse stellen in hen huysen, seyt die Heere,

12

Ephraim heeft my omringt int loochenen, ende het huys van Israhel int bedroch, maer Iudas die ghetuyghe is met Gode nederghedaelt, ende metten heylighen ghetrouwe.