Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .x. Capittel.

1

⁺ISrael is eenen wijnstruyc met veel bladeren, sijn vrucht is hem ghelijck ghemaect, nae die menichte sijnder vrucht heeft hy die outaren vermenichfuldicht, nae die vruchtbaerheyt sijnder eerden heeft hy oueruloedich van affgodts beelden gheweest.

+ A

2

Hen herte is ghedeylt, sij sullen nv vergaen hy sal hen afgods beelden breken, hy sal hen outaeren verderuen,

3

want sij sullen nv segghen. Wij en hebben gheenen coninck, want wij en vreesen den Heere niet, ende wat sal ons die coninc doen?

4

Spreect woorden van des onnutten visioens, ⁺ende ghy sult een verbont maken, ende het ordeel sal als bitterheyt groeyen op die voren des ackers.

+ B

5

Die bewoonders van Samarien hebben die coeyen van Bethauen gheeert, want sijn volc heeft op hem gheweent, ende sijn tempel bewaerders hebben hen op hem verhuecht in sijn glorie want hy is van hem wech ghegaen,

6

Want hy is voorwaer ooc in Assur ghedraghen tot een ghifte den coninc den wrekere. Die bescaemtheyt sal Ephraim beuanghen, ende Israel sal beschaemt werden in sijnen wille

7

⁺Samaria heeft sijnen coninc doen wechgaen als den scuym op daensicht des waters.

+ C

8

Ende die hoochden des afgodts sullen verdoruen worden Israels sonde, die clissen ende bramen sullen op hen outaren climmen, ende si sullen den bergen seggen Bedect ons, ende den hueuelen. Valt op ons,

9

van die daghen van Gabaa heeft Israel ghesondicht, daer hebben sij ghestaen, den strijt en salse niet

[p. *692]

beuanghen in Gabaa op die kinderen der boosheyt.

10

Nae mijn begheerte sal icse straffen, die volcken sullen op hen verghadert werden, als sij sullen berispt worden om hen twee boosheden,

11

Ephraim is een veerscalf gheleert die dorscherie lief te hebben, ende ick heb ghegaen ouer die schoonheyt van sijnen halse. Ick sal climmen op Ephraim, Iudas sal ackeren Iacob sal voor si seluen die voren breken.

12

Saeyt voor v lieden in rechtuerdicheyt, ende maeyt inden mont der bermhericheyt, ⁺vernieuwt v lieden eenen nieuwen acker want tis tijt om den Heere te versoecken, als hy sal ghecomen sijn die v lieden rechtuerdicheyt leeren sal.

+ D

13

Ghy hebt ongoddelijcheyt gheackert, ghy hebt boosheyt ghemaeyt, ghi hebt die vrucht der loghene gheten, want ghy hebt betrouwen ghehadt in uwe weghen, in die menichte van uwen stercken.

14

Daer sal een gheruchte opstaen onder v volck, ende alle uwe stercten sullen verdoruen worden, ghelijck Salmana verdoruen is gheweest, van thuys des gheens die Baal wreecte inden dach des strijts, als die moeder op die kinderen ghedoot wert.

15

Alsoo heeft v Bethel ghedaen, van daensicht der quaetheyt van uwe archeden.