Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .ix. Capittel.

1

⁺EN wilt v niet verblijden Israel, en wilt v niet verhueghen als die volcken, want ghy hebt oncuyscheyt bedreuen van uwen God, ghi hebt den loon lieft gehadt bouen alle dorschuloeren van tarwen

+ A

2

Den dorschuloer ende die persse en salse niet voeden, ende den wijn sal hen faelgeren.

3

Sij en sullen in des Heeren lant niet woonen, Ephraim is weder ghekeert in Egipten, ende in die Assiriers heeft hy gheten dat onsuyuer is.

4

Sij en sullen den Heere gheenen wijn offeren, ende si en sullen hem niet behaghen, hen sacrificien sullen sijn als tbroot der rouwigher, alle diet eten, sullen besmet worden, want hen broot is haerder zielen, het en sal in des Heeren huys niet comen,

5

Wat suldi doen inden hooghen dach, ⁺inden dach van des Heeren feeste?

+ B

6

want siet si sijn wech ghereyst van die verwoestheyt, Egiptus salse vergaderen Memphis salse begrauen, hen begheerlijc siluer sal die netele beeruen, die clesse sal in hen tabernakelen sijn,

7

Die daghen der besoeckinghe sijn ghecomen, die daghen der vergheldinge sijn ghecomen, weet Israel, dat ghy een dwaes propheet sijt ende een rasende geestelijc man, om die menichte uwer boosheyt, ende die menichte uwer ontsinnicheyt.

8

Die wachter van Ephraim is met mijnen Godt, die propheet is eenen strick des vals gheworden op alle sijn weghen die rasernie is int huys sijns Gods.

9

Sij hebben diep ghesondicht, als in die daghen van Gabaa, ⁺hy sal hen boosheden ghedencken, ende hen sonden sal hy besoecken.

+ C

10

Als druyuen in die wildernisse heb ic Israel geuonden als die ierste vruchten vanden vijgeboom op sijnen tsop heb ick hen vaderen ghesien, ende si sijn inghegaen tot Beelphegor, ende si sijn verureemt ter bescaemtheyt, ende si sijn afgrijselijc gheworden, als die dinghen die sij bemint hebben,

11

Ephraim is als eenen voghel wech geuloghen, hen glorie is vander baringe, ende vanden buyc ende, van dat ontfanghen,

12

Ende al ist dat si ooc hen kinderen opuoeden, ick salse sonder kinderen maken onder die menschen. Ende wee hen, als ick van hen sal wechghegaen sijn,

13

⁺Ephraim (soo ick ghesien hebbe) was als Tyrus ghefundeert in schoonheyt, ende Ephraim sal sijn kinderen totten dootslaender wtleyden.

+ D

14

Gheeft hen Heere, Wat suldi hen gheuen? Gheeft hen eenen buyck sonder kinderen, ende drooghe borsten.

15

Alle hen archeden zijn in Galgal, want daer heb icse ghehaedt om die quaetheyt van haren vonden sal icse wt mijnen huyse worpen, Ick en salse voortaen niet meer lief hebben, alle hen princen sijn wechgaende,

16

Ephraim is gheslaghen, hen wortele is wtghedroocht. Sij en sullen gheensins vrucht doen. Ende ist oock dat sij genereren, soo sal ick die alderliefste haers buycs dooden,

17

Mijn Godt salse verworpen, om dat sij hem niet ghehoort en hebben, ende sij sullen onghestadich wesen in die natien.