Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .viij. Capittel.

1

⁺LAet in v kele een trompet wesen als den aernt op des Heeren huys, om dat sij mijn verbont ouertreden hebben, ende mijn wet ouertreden hebben.

+ A

2

Sij sullen my aenroepen, Mijn God wij Israel hebben v ghekent,

3

Israel heeft dat goet verworpen, die viant sal hem veruolghen.

4

Sij hebben gheregneert ende niet wt mi, si hebben princen gheweest ende ick en hebs niet gheweten, hen siluer ende hen gout hebben si voor hen seluen tot affgoden ghemaect, dat si vergaen souden.

5

⁺V calf is wech gheworpen o Samaria mijnen rasenden toren is gram gheworden op hen, hoe lange en sullen si niet moghen ghesuyuert wesen?

+ B

6

want hy is selue oock wt Israel, die constenaer heeft hem ghemaect, ende ten is gheen god, want het calf van Samarien sal tot der spinnen webbe wesen,

7

want sij sullen wint sayen, ende den storm wint maeyen. Het staende stroo daer en is gheen groeytsel in, ten sal gheen meel maken ende al ist dattet maket, dat sullen die vreemde eten,

8

Israel is verslonden, ⁺hy is nv gheworden onder die natien als een onreyn vat,

+ C

9

want si sijn opgheclommen tot Assur als eenen wilden ezel si seluen verlaten alleen, Ephraim hebben ghiften ghegheuen den liefhebbers.

10

Ende si hebben ooc om loon die natien ghehuert, nv sal icse vergaderen, ende si sullen een luttel tijts rusten van des conincs ende der princen last,

11

want Ephraim heeft veel outaren ghemaect om te fondighen, die outaren sijn hem gheworden tot misdaet.

12

Ick sal hem scrijuen mijn meniger hande wetten, ⁺die als vreemde sijn gheacht.

+ D

13

Sij sullen flachofferanden offeren, si sullen vleesch ten offer dooden ende eten, ende die Heere en salse niet ontfanghen, nv sal hy haerder boosheyt ghedencken, ende sal hen sonden besoecken, si sullen wederom in Egipten keeren.

14

Ende Israel heeft sijns makers vergeten, ende hy heeft afgods tempels getimmert, ende Iudas heeft veel vaste steden ghemaect, ende ic sal tvier in zijn steden senden, ende het sal sijn huysen verslinden.