Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .vij. Capittel.

1

⁺DOen ic Israel wilde genesen, soo is Ephraims boosheyt ontdect, ende die quaetheyt van Samarien, want si hebben loghentael ghewrocht, ende die dief is binnen ghegaen roouende, het roouerken van buyten.

+ A

2

Ende op dat si by auontueren niet en segghen in hen herten dat ick alle haerlieder quaetheyt ghedachtich ben gheweest, soo hebben hen nv hen vonden omuanghen, voor mijn aensicht sijn die ghedaen,

3

In hen quaetheyt hebben sij den coninck verblijt, ende in hen loghenen die princen.

4

Alle die ouerspeelders zijn als eenen ouen onsteken vanden backer die stadt heeft een luttelken gherust van dat mencsel des heefs, tot dat heel gheheeft was.

5

Het is ons conincs dach, ⁺die princen hebben begonst te rasen vanden wijn, hy heeft zijn hant wtgesteken metten bespotters,

+ B

6

want si hebben hen herte als eenen ouen daer aengeleyt als hy hen laghen leyde, alle den nacht heeft hy gheslapen hen cokende, des morghens is hy ontsteken als het vier der vlammen.

7

Sij sijn alle heet gheworden als eenen ouen, ende si hebben hen rechters verslint alle hen coninghen sijn gheuallen, daer en is niemant onder hen die tot my roepe,

8

Ephraim worde selue onder die volcken vermenghet, Ephraim is gheworden een asschen broot, dat niet ghekeert en wort.

9

Die vreemde hebben sijn macht gheten, ende hy en heues niet gheweten, Ende oock sijn die grijse hairen in hem wt ghestort, ⁺ende hy en heues niet gheweten,

+ C

10

ende die hoouerdie van Israel sal verootmoedicht werden in sijn aensicht, ende sij en sijn niet wederom ghekeert tot den Heere haren Godt, ende si en hebben hem niet ghesocht in alle dese dinghen.

11

Ende Ephraim is gheworden als een verleyde duyue gheen herte hebbende, Sij aenriepen Egipten, si sijn tot die Assirianen wech ghegaen,

12

ende als sij sullen

[p. *691]

ghereyst sijn soo sal ick mijn net op hen spraeyen, als eenen voghel des hemels sal icse neder trecken, ic sal se slaen, nae dat ghehoor van hen verghaderinghe.

13

Wee hen want sij sijn van my wech ghegaen, sij sullen verdoruen werden, om dat sij teghen mij ouertreden hebben, ⁺ende ick hebse verlost, ende sij hebben teghen my loghenen ghesproken.

+ D

14

Ende sij en hebben tot my niet gheroepen in hen herte, maer si sullen huylen in hen bedden, op die tarwe ende den wijn herknouden sij, sij sijn van my wech ghegaen,

15

ende ick hebse gheleert, ende ic hebbe hen armen ghesterct, ende teghen my hebben sij quaetheyt ghepeynst.

16

Sij zijn weder ghekeert om dat sij sijn souden sonder iock, si sijn gheworden als eenen bedriegelijcken boghe, hen princen sullen door tsweert vallen, van die rasernie haerder tonghe. Dit is hen bespottinghe int lant van Egipten.