Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .vi. Capittel.

⁺IN hen lijden sullen sij des morghens vroech tsamen opstaen tot my.

+ A

1

Coemt ende laet ons wederkeeren totten Heere,

2

want hy heuet geuangen, ende hy sal ons ghesont maken, hy sal ons slaen ende ghenesen.

3

Hy sal ons leuende maken nae twee daghen, inden derden dach sal hi ons verwecken, ende wij sullen leuen in sijn aenschijn, wij sullen weten, ende volghen dat wij den Heere kennen, ⁺als eenen vroeghen dagheraet is sijnen wtganc bereydt, ende hy sal ons comen als eenen tijdeghen ende spaden reghen der eerden

+ B

4

wat sal ick v doen Ephraim? wat sal ick v doen Iuda? v bermherticheyt als des morghenstonts wolcke, ende als den dauwe vroech vergaende.

5

Daerom heb icse ghescaeft door die propheten, ick hebse ghedoot met die woorden mijns mont, ⁺ende v ordeelen sullen als een licht wtcomen,

+ C

6

want ic heb bermherticheyt ghewilt ende niet die offerande, ende Gods kennisse meer dant brantofferen,

7

Maer sij hebben als Adam het verbont ouerghetreden, daer hebben sij teghen my ouertreden,

8

Galaad is een stadt der gheender die den affgod maken, vertreden vanden bloede.

9

Ende als die kinnebacken der mannen der moordenaren, ⁺mede deelachtich der priesteren die inden wech dootslaen die ghene die nae Sichem reysen, want si hebben boosheyt bedreuen,

+ D

10

Int huys van Israel heb ick een grouwelijc dinck ghesien, daer sijn die oncuyscheden van Ephraim, Israel is besmedt,

11

Ende ghy oock Iuda stelt v seluen den oochst, als ick die gheuanghenisse mijns volcs sal wederom ghekeert hebben.