Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .v. Capittel.

1

⁺HOort dit ghi priesters, ende aenmerct ghi huys van Israel, ende des conincs huys luystert toe want v lieden is het ordeel, want ghy sijt eenen strick gheworden der bescouwinghen, ende een wtghespraeyt net opden berch Thabor,

+ A

2

Ende die slach offeranden hebdi affghekeert in die diepte, ende ick ben een onderwijser van hen allen.

3

Ick weet Ephraim ende Israel en is niet verborghen voor my, want Ephraim heeft nv oncuyscheyt bedreuen. Israel is ontsuyuert.

4

Sij en sullen hen ghedachten niet gheuen dat si wederkeeren souden tot haren God, ⁺want den gheest der oncuyscheden is int midden van hen, ende den Heere en hebben sij niet ghekent.

+ B

5

Ende die vermetelijcheyt van Israel sal antwoorden in zijn aensicht, ende Israel ende Ephraim sullen vallen in hen boosheyt, ende Iudas sal ooc met hen vallen,

6

met hen cudden van cleyn vee en met hen groot vee sullen si gaen om den Heere te soecken, ende si en sullen hem niet vinden, want hy is van henlieden wech ghenomen,

7

Teghen den Heere hebben sij ouerghetreden, want si hebben vreemde kinderen ghewonnen, ⁺nv sal hen die maent verslinden met haren deelen,

+ C

8

maect gheclanc metter basoenen in Gabaa, metten trompet in Rama, Huylt in Bethauen achter uwen rugghe Beniamin,

9

Ephraim sal tot een verwoestinghe sijn, inden dach der berispinghen, in die gheslachten van Israel heb ick trouwe ghetoont.

10

Die princen van Iuda sijn gheworden als die de pale voorder tot hemwaerts nemen, ic sal op hen mijn gramscap als water wt storten,

11

Ephraim is onrechte beschuldinge lijdende, gebroken doort ordeel, want hy heeft begonst wech te gaen nae die onreynicheden.

12

⁺Ende ick sal wesen als een motte Ephraim, ende als verrotheyt den huyse van Iuda,

+ D

13

Ende Ephraim heeft zijn quale ghesien ende Iudas sijnen bant, ende Ephraim is wechgegaen tot Assur, ende hy heeft ghesonden tot den coninc den wreker ende hy en sal v lieden niet connen ghenesen, noch hy en sal den bant van v lieden niet connen ontbinden,

14

want ic ben Ephraim als een leeuwinne, ende als dat welpen eens leeuws den huyse van Iuda. Ick ic sal se vanghen, ende sal gaen, ick salse wech draghen, ende daer en is niemant diese verlosse.

15

Ick sal gaende wederom keeren tot mijn plaetse, tot dat ghy ontbreect ende mijn aensicht soect.