Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xiiij. Capittel.

1

⁺VErgaen moet Samarien, want si heeft haren Godt tot bitterheyt verwect, laetse metten sweerde verghaen, hen cleyn kinderen laet doot ghestooten worden, ende hen beuruchte vrouwen open ghesneden.

+ A

2

Bekeert v Israel totten Heere uwen Godt, want ghy sijt gheuallen in v boosheyt,

3

Neemt woorden met v lieden, ende bekeert v totten Heere, ⁺ende segghet hem. Neemt alle boosheyt aff, ende ontfanct het goet, ende wij sullen betalen die calueren onser lippen,

+ B

4

Assur en sal ons niet verlossen, wij en sullen op gheen peert climmen, noch wij en sullen voortaen niet meer segghen dat onsen goden sijn die wercken onser handen, want ghy sult ontfermen op die weese die onder v is.

5

⁺Ic sal hen quetsinghen ghenesen, ick salse vrijwillichlijck lief hebben, want mijn rasende gramscap is van hen afghekeert

+ C

6

Ic sal Israel als eenen dauw sijn, hy sal groeyen als een lelie, ende sijn wortele sal wtschieten als die wortele van Libanus.

7

Sijn tacken sullen gaen, ende als eenen olijfboom sal zijn glorie zijn, ende sijnen ruec als van Libanus,

8

die in sijn scaduwe sitten sullen bekeert worden sij sullen leuen van die tarwe, ⁺ende sij sullen groeyen als eenen wijngaert, sijn ghedenckenisse sal zijn als den wijn van Libanus,

+ D

9

Ephraim wat leydt my voorts aen die affgoden? Ick sal hem verhooren, ende ick sal hem beschicken als eenen groeynde abeel boom, wt my is v vrucht ghevonden,

10

wie isser wijs, ende sal dese dinghen verstaen? ende wie isser verstandich, ende sal dese dinghen weten? want des Heeren weghen sijn recht, ende die rechtuerdighe sullen daer in wandelen, maer die ouertreders sullen daer in vallen.

Hier voleyndt die Propheet Ozee.