Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xij. Capittel.

1

⁺IN dien tijde sal Michael die groote prince opstaen, die voor ws volcks kinderen staet, ende daer sal eenen tijt comen, desghelijcs niet geweest en is van dien tijt dat die Heydenen begonsten te sijne tot dien tijt toe. Ende in dien tijt sal v volc behouden worden, alle die gheuonden sal worden ghescreuen int boeck.

+ A

2

Ende veel van dese die int stof der eerden slapen, sullen ontwaken, die sommighe ten eewighen leuen, ende die andere ter versmaetheyt dat sijt altijt sien souden,

3

maer die gheleert sullen wesen, die sullen blincken als het schijnsel des firmaments, ende die der vele ter rechtuerdicheyt leeren, als sterren in die eewighe eewicheden,

4

⁺Maer ghy Daniel sluyt die woorden ende teekent den boec totten gesetten tijde, daer salder vele doorgaen, ende die wetenheyt sal menigherhande wesen.

+ B

5

Ende ic Daniel heb ghesien, ende siet gelijc twee andere stonden daer, die eene op dese sijde opden oeuer vander vloet, ende die andere op dander sijde, aen den anderen oeuere des vloets.

6

Ende ick heb gheseyt totten man die met lijnen ghecleedt was, die op dwater des vloets stont. Tot wat tijde salt eynde wesen van desen wonderlijckheden?

7

Ende ick heb den man gehoort die metten lijnen ghecleedt was, die op die wateren des vloets stont, als hy sijn rechte ende slincke hant opghehauen hadde inden hemel ende ghesworen hadde door den leuenden inder eewicheyt, ⁺datter soude wesen tot eenen tijt, ende twee tijden, ende die helicht eens tijts. Ende als volbracht sal wesen die verstroeyinghe vander hant des heylichs volcs, dan sullen alle dese dinghen volbracht werden.

+ C

8

Ende ick hebt ghehoort, ende ick en hebs niet verstaen. Ende heb gheseyt. Mijn Heere wat sal nae dese dinghen wesen?

9

Ende hy heeft gheseydt. Ghaet henen Daniel want dese woorden sijn ghesloten, ende toeghesegelt, totten voorghescicten tijt.

10

Vele sullender wtghecoren ende wit ghemaect worden, ende als vier gheproeft worden, ende die ongoddelijcke sullen ongoddelijc doen, ⁺ende alle die ongoddelijcke en sullent niet verstaen, maer die gheleerde sullent verstaen.

+ D

11

Ende vanden tijt als het eewich sacrificie sal affghedaen werden, ende dat die affgrijselijcheyt ghesteldt sal wesen tot een verwoestinghe, sullen wesen duysent twee hondert ende neghentich daghen.

12

Salich is hy die verbeydt, ende coemt tot die duysent drij hondert ende vijuendertich daghen,

13

maer ghaet ghy totten voorghescicten tijt, ende ghy sult rusten ende ghy sult staen in v deel totten eynde der daghen.

Tot hier toe lesen wij Danielem inden Hebreeusschen boeck. Datter nae volcht totten eynde des boecs is ouergestelt wt Theodocions boec.