Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xi. Capittel.

1

⁺ENde ick stont van dierste iaer van Darius van Meden dat hy versterct soude worden ende machtich.

+ A

2

Ende nv sal ik v die waerheyt vercondighen. Siet daer sullen noch drij coninghen staen in Perssen, ende die vierde sal rijck worden met wtermaten seer veel rijcdommen bouen alle, ende als hy sal machtich gheworden sijn met sijn rijcdommen, soo sal hijse alle verwecken teghen het rijck der griecken

3

maer daer sal een sterck coninck opstaen, ende die sal heerscappie hebben met veel crachts, ende hy sal doen dat hem belieuen sal.

4

Ende als hy staen sal, soo sal sijn rijck vernielt worden, ende tsal ghedeylt worden in die vier winden des hemels, maer niet in sijn naecomelinghen, noch ooc niet nae sijn macht waer mede hy heerscappie ghehadt heeft, want zijn rijc sal ghescoert worden oock tot vreemde, wtghenomen dese.

5

Ende die coninck van suyden sal versterct worden, ende van sijnen princen salder een machtich worden bouen hem ende hy sal heerschappie hebben met een heerlijckheyt, want sijn heerscappie sal groot sijn.

6

Ende nae deynde der iaren sullen si met een verbont vereenicht worden ende die dochter des conincs van tsuyden sal comen totten coninck vanden noorden om vrintscap te maken ende hy en sal die stercheyt des arms niet vercrijghen, noch sijn saet en sal niet staen, ende si sal gheleuert werden, ende die haer aenghebracht hebben, haer ionghelinghen, ende die haer verstercten in die tijden.

7

Ende van dat spruytsel haerder wortelen sal een plantinghe staen ende hy sal comen met een heyr, ende hy sal comen int lantscap des conincs vanden noorden, ende hy salse misbruycken, ende hy salse vercrijghen.

8

⁺Daer bouen oock hen goden ende ghesneden affgoden, ende oock die costelijcke vaten van siluer ende gout sal hy gheuanghen wechnemen in Egipten. Hy sal douerhant crijghen teghen den coninck vanden noorden,

+ B

9

ende die coninck van suyden sal int rijck comen, ende hy sal wederkeeren tot sijn lant,

10

maer sijn sonen sullen verwect wesen, ende sij sullen vergaderen een menichte van seer veel heyren ende hy sal comen haestende ende oueruloedende, ende hy sal wederkeeren, ende verwect werden, ende sal strijden met sijn macht.

11

Ende die coninck van suyden verwect sijnde sal wtghaen, ende hy sal strijden teghen den coninck van noorden, ende hy sal een seer groote menichte bereyden, ende die menichte sal in die handen gheleuert werden.

12

Ende hi sal een menichte vanghen, ende sijn herte sal verhauen worden, ende hy salder veel duysenden nederwerpen, maer hy en sal douerhant niet hebben,

13

want die coninck van noorden sal wederom ghekeert worden, ende hy sal een menighte bereyden veel meerdere dan te voren, ende ten eynde der tijden ende iaren sal hy comen haestende met een groot heyr ende wtermaten groote rijcdommen.

14

⁺Ende in die tijden sullender vele opstaen teghen den coninc vanden suyden ende oock die kinderen van die ouertreders ws volcks sullen verhauen worden om dat visioen te volbrenghen ende sij sullen vallen.

+ C

15

Ende die coninc vanden noorden sal comen ende hy sal eenen dijc te hoope draghen, ende hy sal die alderstercste steden in nemen, ende die armen van tsuyden en sullens niet verdraghen, ende sijn wtuercorenen sullen opstaen om te wederstaen, ende daer en sal gheen stercheyt wesen.

16

Ende op hem comende sal hijt maken nae sijn behaghen, ende daer en sal niemant zijn die teghen sijn aensicht stae, ende hi sal int costelijc lant staen, ende tsal verteert worden in sijn hant.

17

Ende hy sal sijn aensicht stellen om te comen te houden alle zijn rijck, ende hy sal rechte dinghen met hem doen, ende hy sal hem die dochter der vrouwen gheuen, om dat hy dat soude omworpen, ende ten sal niet staen, noch ten sal sijne niet wesen.

18

Ende hy sal sijn aensicht keeren tot die eylanden, ende hy salder vele in nemen, ende hy sal den prince sijns verwijts doen ophouden, ende sijn versmaetheyt sal op hem weder ghekeert werden.

19

Ende hy sal sijn aensicht wederom keeren tot die heerlijcheyt van sijnen lande, ende hy sal hem stooten, ende sal vallen, ende en sal niet gheuonden worden.

20

Ende in sijn plaetse sal staen een dalder snootste, ende des coninclijcs cieraets onweerdich, ende binnen corte daghen sal hy vernielt werden, niet in rasende gramscap, oft inden strijt.

21

⁺Ende in sijn plaetse sal een versmaede staen, ende hem en sal gheen coninclijcke eere aenghedaen werden, ende hy sal al heymelijck comen, ende hi sal het rijck vercrijghen door bedroch.

+ D

22

Ende die armen vanden strijtvarighen sullen verwonnen worden van sijn aensicht ende vernielt, ende daer toe die prince des verbonts.

23

Ende nae die vrintscap sal hy met hen bedroch maken, ende hy sal optrecken, ende hem verwinnen met een luttel volcs,

24

ende hy sal in oueruloedighe ende vruchtbarighe steden gaen, ende hy sal doen dat sijn vaders niet ghedaen en hebben, ende die vaderen sijnder vaderen, die bueten, ende den roof, ende hen rijcdommen sal hi verstroeyen, ende teghen die aldervaste ghedachten sal hy raet aengaen, ende dat tot eenen tijt.

25

Ende zijn stercheyt, ende sijn herte sal verwect worden teghen den coninck van tsuyden met een groot heyr. Ende die coninck vanden suyden sal verwect worden ter oorloghen met veel ende wtermaten stercke helpen, ende sij en sullen niet staen, want si sullen teghen hem raeden houden.

26

Ende die met hem broot eten, sullen hem vernielen, ende sijn

[p. *685]

heyr sal verdruct werden, ende daer sullen veel ghedoode vallen.

27

⁺Ende der twee coninghen herte sal wesen om quaet te doen, ende aen een tafel sullen sij loghene spreken, ende sij en sullen niet vorderen, want het eynde is noch tot op eenen anderen tijt.

+ E

28

Ende hy sal wederkeeren in sijn lant met veel rijcdommen, ende sijn herte sal wesen teghen het heylich testament, ende hy salt doen, ende hy sal wederkeeren in sijn lant.

29

Ten ghesetten tijde sal hy wederkeeren, ende sal comen ten suyden, ende het laetste en sal den iersten niet ghelijck wesen.

30

Ende ouer hem sullen groote scepen comen, ende die Romeynen, ende hy sal gheslaghen worden, ende hy sal wederom keeren, ende hy sal verbolghen werden teghen het testament der heyligher plaetsen, ende hi salt doen ende hy sal wederkeeren ende dencken teghen die ghene die misdaen hebben teghen het testament der heyliger plaetsen.

31

Ende van hem sullen armen staen, ende sij sullen die heylige plaetse der stercheyt besmetten, ende sij sullen het eewich sacrificie wech nemen, ende si sullen die affgrijselijcheyt gheuen tot een verwoestinghe.

32

Ende die ongoddelijcke sullen int testament bedrieghelijc veynsen, maer het volc dat sijnen Godt kent salt vercrijghen ende doen.

33

⁺Ende die gheleerde int volc sullender vele leeren, ende sij sullen vallen door tsweert, ende door die vlamme, ende in die gheuanghenisse, ende inden roof der daghen.

+ F

34

Ende als sij sullen gheuallen sijn, soo sullen sij opghehauen worden met een seer cleyne helpe, ende daer sullender vele met hen versaemt worden bedrieghelijc.

35

Ende vanden gheleerden sullender vallen, op dat sij souden ghesmolten worden, ende wtghecoren, ende wit ghemaect, tot den voorghescicten tijt, want daer sal noch eenen anderen tijt wesen

36

Ende die coninck sal nae sijnen wille doen, ende hy sal verheuen worden, ende groot ghemaect teghen alle goden, ende teghen den Godt der goden sal hy groote dinghen spreken, ende hy sal voorspoedich wesen, tot dat die gramscap veruult worde, want die wtsprake des oordeels is volbracht.

37

Ende sijnder vaderen Godt en sal hy niet achten, ende hy sal in die begheerten der vrouwen wesen, ende gheen vanden goden achten want hy sal teghen alle dinghen opstaen,

38

maer den god Maozim sal hy in sijn plaetse eeren, ende den god den welcken sijn vaderen niet ghekent en hebben sal hy eeren met gout ende siluer, ende costelijc ghesteente, ende met costelijcke dinghen.

39

⁺Ende hy sal maken, dat hy Maozim sal beurijen met eenen vreemden god, den welcken hy ghekent heeft, ende hy sal die glorie vermenichfuldighen, ende hy sal hen macht gheuen in veel dinghen, ende hy sal dlant deylen om niet.

+ G

40

Ende inden voorghescicten tijt sal teghen hem strijden die coninc vanden suyden, ende als eenen tempeest sal teghen hem comen den coninc vanden noorden, met waghenen, ende met rosuolck, ende met een groote vlote scepen, ende hy sal in die landen gaen, ende hy salse vernielen, ende door gaen,

41

ende hy sal int glorioos lant gaen, ende daer salder vele vallen, maer dese sullen alleen behouden worden van sijn handt, Edom ende Moab, ende dbeghinsel der kinderen van Ammon.

42

Ende hi sal zijn handen seynden in die landen, ende dlant van Egipten en salt niet ontulieden.

43

Ende hy sal heerscappie hebben ouer die scatten des gouts ende des siluers, ende in alle costelijcheden van Egipten. Oock sal hy door Lybien ende dat Morianen lant gaen,

44

ende dat gheruchte sal hem veruaren vanden oosten, ende vanden noorden, ende hy sal in een groote menichte comen, op dat hijer vele verniele ende doode.

45

Ende hy sal vast maken sijn tabernakel Apadno tusschen twee zeen opden heerlijcken ende heylighen berch, ende hy sal comen tot sijn hoochde, ende niemant en sal hem helpen.